University of Aruba ta celebra cu orguyo e finalisacion exitoso di e Calificacion Basico den Evaluacion / Basiskwalificatie Examinering (BKE) pa e di cinco cohorte di participante. Durante un ceremonia special di graduacion, a otorga certificado na 11 docente, representando diferente facultad y programa di henter e universidad.
Un total di 12 participante a inscribi den e programa, di cual 11 a cumpli exitosamente cu tur e rekisitonan. E logro aki ta refleha e compromiso di nos staf academico pa continuamente fortalece nan competencianan di siñansa y evaluacion, asina apoyando un educacion di alta calidad.
E BKE ta un di e iniciativanan clave di desaroyo profesional di University of Aruba y ta sirbi como un calificacion importante pa e docentenan. E programa ta centra rond di cuater competencia nuclear di e docente universitario como evaluador. E participantenan ta demostra nan capacidad pa actua dentro di e politica institucional y organizacion di evaluacion, alinea e practicanan di evaluacion cu e programa educativo, aplica conocemento y habilidadnan di evaluacion debidamente, y continuamente mantene y desaroya mas aun nan competencia di evaluacion. Pa medio di un dossier y un combersacion di evaluacion, e participantenan ta demostra cu nan ta cumpli cu e estandarnan profesional aki y cu nan por contribui na evaluacionnan di alta calidad, confiabel y valido den enseñansa superior.
E BKE ta diseña y ehecuta pa un ekipo di specialista educativo di e Center for Quality Assurance. E graduacion di e di cinco cohorte aki ta marca un milestone institucional importante. Den un transcurso di apenas tres aña, rond di 75% di e staf academico full-time di e Universidad a obtene un calificacion di BKE of un credencial ekivalente. Esto ta demostra e compromiso continuo di e Universidad cu excelencia educativo, miho continuo, y preparacion pa acreditacion.
E BKE ta un parti integral di e agenda mas amplio di profesionalisacion di University of Aruba y ta alinea cu e ambicionnan describi den e Multi-Annual Corporate Strategy 2026–2035, cual ta identifica desaroyo di personal y calidad educativo como prioridadnan strategico.
University of Aruba ta felicita tur e graduadonan cu e logro importante aki y ta gradici e entrenadornan, evaluadornan, facultadnan, O&C-nan y e liderazgo cu ta sigui apoya e desaroyo profesional di nos comunidad academico. Masha pabien na e graduadonan di BKE Cohorte 5!
