Diabierna, 3 di juli 2026, Melendy Neuman a lansa su prome publicacion di e serie ‘Mundo di Neo’, titula ‘Neo ta sinti’. Esaki a tuma lugar na Biblioteca Nacional Aruba. Rondona pa Melendy su famia y conocirnan el a introduci e meta di e buki y a conta un parti di e storia na e muchanan presente. ‘Neo ta sinti’ ta trata e emocionnan: contento, tristo, miedo, rabia y stima. E contenido di cada parti di e buki ta brinda oportunidad na e mucha pa expresa su mes y pa e mayor of educado trata cada emocion mas profundo.
Biblioteca pronto tin e buki disponibel pa fia of por tuma contacto cu Melendy Bisslik-Neuman via di su pagina di Facebook pa un copia.
Ken ta Melendy Neuman?
Melendy Neuman ta docente di investigacion na Instituto Pedagogico Arubano. Manera cu Melendy a yega Aruba bek despues di su estudio na Hulanda na 2012, su interes a lanta pa sigui cursonan pa siña un poco mas di nos idioma Papiamento.
Alabes, Melendy a cuminsa atende actividadnan cultural, manera, competencia di Poeta di Patria. Tambe, e sa skirbi y declama poema pa ocasionnan special, entre otro, graduacion di scol, entiero y pa celebracion di 35 aña di Status Aparte.
Melendy ta gusta skirbi poema cu tin frasenan cortico, cu ta facil pa comprende y cu ta rima. Segun Melendy, e rima di un poema por ta un elemento cu ta mantene e atencion di e audiencia of lesado. E pasion pa skirbi a lanta aun mas despues di e nacemento di su yiu homber. Su yiu homber, cu ta gusta scucha cuenta y tambe crea storia, a inspira Melendy skirbi su prome buki ‘Mundo di Neo: Neo ta sinti’. Fantasia di su yiu homber ta inclui den e storia aki. E ta skirbi na Papiamento p’asina contribui na un repertorio mas amplio di buki pa lesa den nos mesun idioma. Un idioma, cu segun Melendy, ta zona asina bunita den nos horea.
Como docente, Melendy no por a keda sin incorpora e elemento di siñamento den e storia. Specialmente pa e storia crea momento di dialogo entre e mayor of educado y e mucha.
