E pregunta cu e comunidad ta haci awe no ta un cuestion di opinion, sino di e obligacion di rendicion di cuenta di un gobierno den un Estado di derecho. Ora un Prome Minister ta actua, e ta hasié den su capacidad como mandatario, p’esei, tur accion mester ta inculka den e cadena di control publico.
E falta di splicacion tocante e “criterionan di seleccion” y e “fuente di financiamento” di e verfmento di casnan priva ta kibra e confiansa den nos institucionnan. Den un democracia, e uzo di empleadonan di Land Aruba pa trabounan priva sin cu ta existi un ordenansa of directiva publico cu ta hustifica esaki ta lanta preguntanan grave di abuso di poder. Esaki ta un forma di faboritismo cu ta contradeci e obligacionnan di igualdad den trato cu gobierno tin pa cu tur ciudadano. Transparencia no ta un privilegio cu gobierno ta duna, ta un derecho cu ta nace for di nos sistema constitucional.
Banda di esaki, Minister Gerlien Croes y Minister Geoffrey Wever ta sigui e mesun modus operandus. Tres cabes di gobierno, tur tres sin transparencia, caminda placa di pueblo ta den wega. Te dia di awe, Minister Geoffrey Wever no ta para responsabel pa e cumplimento cu HOFA, e no tin e decencia y cara pa papia e berdad y dicon e placa di Pais Aruba no ta bay den departamentonan di Gobierno pa asina drecha e departamentonan pa duna e cervicio cu e pueblo merece.
Na mes momento, Minister Gerlien Croes di kende su comportacion den comunicacion ta wordo cuestiona te dia di awe no ta responde pueblo ni Parlamento riba e detayenan di su viahenan den jet priva. Un falta di respet, kisas e eror politica cu pueblo a pone su confiansa riba dje ? Un minister cu claramente por mira cu e no tin e decencia y cara pa papia e berdad? Pesey e ta sconde di su propio spiel ?
Tres cabes cu practicamente ta destruyendo un pais?, of realmente ta hiba Aruba den un futuro scur? Cu un cosmetica cu lo ta e bon caminda , pero kico realmente ta e realidad ? Pa esaki Aruba a vota?