Rotaract Club of Aruba a celebra 35 aña di su iniciativa Back2School, un proyecto cu ta dedica na yuda mucha y famianan durante e temporada di regreso pa scol. E iniciativa ta refleha e caracter di comunidad di Aruba: ora nos uni, nos por haci un diferencia significativo den bida di nos muchanan.
Den 2026, Rotaract su Back2School Project a brinda apoyo na 52 mucha cu tabata preparando pa cuminsa e aña escolar nobo. Di e total aki, 16 mucha a wordo patrocina completo door di Rotaract Club of Aruba. E club a cubri e gastonan esencial pa e muchanan manera schoolgeld, gastonan di airco, tas yen acu material escolar, uniform y keds. E demas muchanan a ricibi tasnan nobo cu articulonan necesario pa cuminsa e aña escolar.
E exito di e iniciativa aki ta danki na e generosidad di miembronan di nos comunidad cu a scoge pa duna bek mientras nan tabata haci nan compras pa ‘back to school’. Durante e campaña di coleccion, comunidad a haya dos manera pa duna bek: cumpra articulonan escolar directamente of haci un donacion financiero pa sostene e iniciativa. Pa tres diasabra consecutivo, miembronan di Rotaract Club of Aruba tabata presente na Dyon Center pa colecta donacionnan y encontra cu miembronan di comunidad. Tur tas, articulo escolar y contribucion a representa un inversion colectivo den educacion di muchanan di Aruba.
Como parti di su compromiso cu comunidad, e iniciativa tambe a haci donacion na Fundacion Pa Nos Comunidad y Orthopedagogisch Centrum Aruba.
Rotaract Club di Aruba ta gradici tur organisacion, compania y persona cu a contribui na exito di e proyecto di Back2School 2026: Dyon Center, Nagico Insurances, BK Consult, ACCS, Testarosa Motors, Aruba Tourism Authority (A.T.A.), Giannis Group, Rotary Club of Aruba, Total Finance, Capital Advisors, Super Shopping y DeWit & VanDorp.
E iniciativa di Back2School ta brinda muchanan e oportunidad pa cuminsa e aña escolar prepara y cu e apoyo cu nan mester. Durante 35 aña, Rotaract Club of Aruba a sigui demostra e balor di sirbi comunidad y di duna bek. E resultado di 2026 ta confirma cu cada acto di generosidad, sin importa con chikito, por haci un diferencia grandi.
Rotaract Club of Aruba ta desea tur alumno y maestro un aña escolar 2026-2027 exitoso!
