Ora nos ta humilde , Dios ta proteha, favorece, y defende hende humilde.
Hende humilde ta disponibel pa wordo usa pa Dios.
Hende humilde semper ta saca man pa yuda otro nan.
Hende humilde no ta wak su propio interes, pero interes di otro tambe ta conta pe.
Hende humilde semper tin un palabra pa encurasha su prohimo.
Hende humilde no ta busca manera pa perhudica su prohimo.
Hende humilde ta biba cu e berdad , y locual e palabra di Dios ta bisa, esey ta e berdad.
Hende orguyoso ta haci manera nan no tin mester di ningun hende, ni sikiera di Dios, nan ta independiente.
Hende humilde ta reconoce cu nan ta depende di Dios, y cu Dios tin e prome lugar den nan bida,
y cu Dios ta na cabes di nan cas, matrimonio, y famia.
Hende humilde no ta laga placa domina den nan bida, pasobra nan ta bon na altura cu placa ta temporal, y solamente den Cristo Hesus nos tin bida eterna.
Si bo ta humilde keda humilde, keda na banda di Dios y no bay mete bo mes den cosnan cu no ta agrada Dios, no laga diabel , ni ningun hende usa bo, keda safe, mantene bo fe, keda limpi, keda cu pensamento puro, no contamina bo mes cu e orguyo, falsedad, infieldad, malicia, inmoralidad y diablura cu e mundo ta ofrece, mantene bo bista riba Cristo Hesus pa bo ta un amigo di Dios.
Wak bon e bentaha cu un hende humilde tin den bida:
Santiago 4:6 ta bisa; Ma E ta duna gracia mas grandi ainda, Pesey Scritura ta bisa: Dios ta resisti e orguyoso, ma ta duna gracia na e humildenan.
Santiago 4;10 ta bisa: Humiya boso mes den e presencia di Senjor, y E lo halsa boso.
Proverbionan 22:4: E recompensa di humildad y e temor di Senjor ta rikesa honor y bida.
Orguyo di un hende lo rebahe, ma esun cu ta di spirito humilde lo ricibi honor. ( Proverbionan 29:23).
Awendia dia humildad ta wordo considera, como hende kens, pasobra e hende humilde no ta cay facilmente den e wega cruel di persigicion di e mundo aki, e ta keda trankil pasobra e sa cu tur hende mester duna cuenta un dia na Dios.
Humildad ta mustra nos cu no tin ningun clase di ganashi den vengansa, odio y arogancia, y cu tur cos tin su tempo, y mas ainda no sa cu no tin ningun hende cu por cay asina abao cu Dios no por lante, y no tin ningun asina halto sinta cu Dios no por bahe, asina cu humildad mester nos pan di cada dia pa nos por vence e plannan di satanas y su grupo di demonjo.
Senjor ta serca di e hende di curason kibra,y e ta salba esnan di spirito abati. ( Salmo 34:18).
David tabata humilde, Goliat tabata orguyoso y vengativo, y awor tur hende sa ta ken a gana e bataya, pasobra Dios nunca lo permiti cu orguyo lo vence humildad.
Ora man di Dios cuminsa trata cu un curason yena cu orguyo, cual ta pensa cu placa y poder ta tur cos, cu hopi biaha ta destrui nan prohimo cu nan propio boca, ta solamente un arepentimento, y confesion na Dios por yuda nan.
E cos aki ta hopi serio, pasobra e hende humilde semper lo tin bentaha cual Dios ta dune, pasobra Dios conoce su curason.
Ta bon pa nos como mayor , haci tur locual ta posibel pa lanta yuinan humilde, ora un mucha ta orguyoso y sin respet, berguensa ta pa su mayornan.
Pastor Marcel Balootje.