E exposicion resultante di e workshop di Atelier’s 89 “Black & White: The Impact of Contrast” lo permanece habri pa un luna adicional na Biblioteca Nacional di Aruba. Inicialmente, e exposicion tabata planifica pa luna di januari, pero debido na e gran interes y acogida positivo di e publico, a wordo dicidi di prolonga e temporada.
Segun Alexis Tromp, artista visual di Biblioteca Nacional, e number di bishitante cu a bin admira e exposicion a supera e expectativa inicial, motibo pa cual a bin tuma e decision pa laga e exposicion keda habri tambe durante luna di februari.
E exposicion ta presenta trabounan di fotografia preto cu blanco, crea door di e participantenan di e workshop, cu un fuerte enfoke riba contraste y expresion visual. E publico tin ainda oportunidad pa aprecia e nivel di creatividad y e mensahe artistico patras di cada obra.
Ademas, Tromp a indica cu hobennan cu tin interes pa drenta e mundo visual y cu ta busca orientacion por tuma contacto directamente cu su persona pa conseho y guia profesional, yamando na number 562-3139.
E exposicion ta habri pa tur publico durante e orario regular di Biblioteca Nacional.