Den cuadro di e celebracion di e gran dia habri (Open Dag) riba 4 di oktober, Brandweer Aruba a habri su portanan na Post Tanki Leendert pa ricibi e comunidad di Aruba den un ambiente familiar, educativo y yen di alegria.
E tereno di e post na Tanki Leendert a transforma den un berdadero “mini Disney World” pa e miles di bishitantenan, di cual e muchanan tabata e protagonistanan principal. E atraccionnan a inclui face painting, e presencia di Marshall di Paw Patrol, demostracion di ambulans, y presentacionnan interactivo di e ekipo di AFAS riba prevencion di candela.
Banda di esaki, e bishitantenan por a mira e trucknan di bombero di cerca y e muchanan por a gosa di e spuitmento di awa. E ambiente festivo a trece un gran satisfaccion pa e personal y coleganan di Brandweer, kendenan a reflexiona riba e alegria y e sonrisa nan cu esaki a trece pa e famianan cu a asisti.
E programa di e dia a conta cu demostracionnan practico di altisimo nivel pa mustra e trabou di rescate cu e bomberonan ta ehecuta diariamente cu tur e protocolnan di siguridad:
(Corta Auto): E prome demostracion a mustra e proceso di rescata un victima pega den un vehiculo despues di un accidente, utilisando e ekiponan specialisa pa habri e auto y saca e persona na un manera sigur.
(Mustracion di Candela): A cende e mesun auto na candela pa duna un demostracion con e bomberonan ta domina y paga un incendio di auto di manera eficiente.
Aparte di e entretenimento, e obhetivo principal di e Open Dag tabata pa conscientisa e comunidad riba e importancia di siguridad den cas. E enfasis principal durante e siman y e evento mes tabata e instalacion di smoke detectors (detectornan di humo).
E vocero di e departamento a haci un apelacion directo na e ciudadanonan pa protega nan famia:
” pone smoke detector den bo cas. No solamente den cushina, pero den cada camber y den sala. Esaki por scapa bo bida y di bo famia, specialmente pa lanta bo for di soño, pasobra dificilmente un persona por hole huma mientras e ta drumi.”
A wordo reitera cu den mayoria di e casonan fatal di incendio, e victimanan ta stik prome di e huma prome cu e candela alcansa nan. Un detector di humo ta e prome liña di defensa pa avisa e famia na tempo, permiti nan sali for di e cas di manera sigur, y yama e instancianan di emergencia manera Brandweer.
