Declaracion fuerte tras revelacion di notanan historico di Cas Real tocante Betico Croes y Status Aparte.
Recientemente, un articulo den prensa Hulandes a causa hopi conmocion y emocion den comunidad di Aruba y den fraccion di MEP, tras revelacion di algun nota historico procedente di Cas Real Hulandes tocante e lucha pa Status Aparte y e figura di Gilberto François “Betico” Croes—e libertador di Pais Aruba danki na ken awe nos tur cu ta biba na Aruba ta biba liber y por tuma nos propio decisionnan.
Evelyn Wever-Croes ta indica cu e documentonan aki a sali na luz den cuadro di un investigacion amplio cu a wordo realisa riba e papel y e historia di Cas Real den e era di esclavitud. E investigacion tabata uno cu realmente conoce e historia di Aruba? Esnan cu a haci e investigacion aki a bin Aruba puntra realmente ken ta Betico Croes y kico a pasa prome cu 1986 y despues di 1986?
Na margen di e investigacion aki, a keda revela anotacionnan di e tempo ey unda Cas Real tabata considera cu e postura y lucha politico di Betico Croes tabata dificulta e relacionnan y cu un Status Aparte lo tabata “fatal” pa Aruba. Den e notanan ey, hasta a yega na cuestiona e impacto di e lider politico y a menciona e posibilidad cu e lo mester a “wegvallen” (desaparece of keda elimina) como factor politico of di otro manera. Dicon realmente kier a impone e “wegvallen” aki?
E revelacionnan aki a cay hopi duro y a provoca un fuerte reaccion di indignacion y emocion. Den un prome declaracion, a wordo remarca cu e noticianan aki mester wordo analisa y asimila cu hopi cautela y profundidad prome cu duna mas comentario oficial.
Sinembargo, e mensahe principal a keda premira cu firmeza y claridad,Segun lider di MEP Evelyn Wever Croes : “Betico Croes ‘wegvallen’, jamas ni nunca. Den nos mente y den nos curason semper el a keda como e homber cu a rescata e pais Aruba, e arquitecto di nos libertad, y den nos curason y mente nunca e ta bay desaparece.”
E asunto aki ta habri un capitulo nobo den e reevaluacion historico di e relacion entre Aruba y Reino Hulandes, mientras cu e figura di Betico Croes ta keda reconfirma como e pilar fundamental di e autonomia di Aruba.