Representantenan di e entidadnan publico caribense di Boneiro, Sint Eustatius y Saba, y e cinco ‘Waddeneilanden’ Texel, Vlieland, Terschelling, Ameland y Schiermonnikoog, dia 1 y 2 di october a bini huntu na Texel pa un programa di trabou di dos dia.
E ocho islanan aki ta uni den e asina yama Colaboracion E8. E8 ta e bos conhunto di e comunidadnan insular hulandes pa loke ta trata gobierno y politica. E8 regularmente ta bini huntu tambe pa intercambia conocemento y traha riba problemanan comun.
E programa di trabou di dos dia
E programa a cuminsa cu yegada di e gobernantenan na e terminal di feri TESO na Den Helder, unda e Comisario di Rey di Noord-Holland, Arthur van Dijk, a yama nan bon bini, prome cu nan a biaha pa Texel. Na nan yegada, ‘burgemeester’ Mark Pol di Texel a yama nan bon bini.
E prome dia a encera un presentacion y un bishita na De Zoete Toekomst, un acercamento inovativo di almasenamento di awa dushi pa agricultura na Texel. E participantenan a siña tocante e desafionan y e oportunidadnan relacioná cu manejo sostenibel di awa dushi pa un isla.
E programa a continua cu un sesion tematico tocante integridad y bon gobernacion insular, bou di guia di e Comisario di Rey Arthur van Dijk. Representantenan di e ‘Waddeneilanden’ y di e islanan caribense a intercambia experiencia tocante resiliencia administrativo, destabilisacion, eleccion transparente y confiabel, y directiva di fundacionnan y organisacionnan semi-publico.
Durante e sesion, Jocelyn Levenstone, gezaghebber di Saba, tambe a tene un presentacion tocante e proximo eleccion di aña 2027 y uzo di votamento cu autorisacion (volmacht), sigui pa un intercambio di experiencia y punto di bista entre e participantenan.
John Soliano, gezaghebber di Boneiro, a duna un presentacion tocante bon gobernacion di organisacionnan di gobierno y organisacionnan semi-publico. El a papia tocante e ambiente complexo den cual e organisacionnan aki ta opera, e rol di gobierno como accionista y e diferente rolnan y responsabilidadnan den e organisacionnan aki. For di e presentacion aki a resulta di ki manera bon gobernacion por duna sosten na e organisacionnan pa logra nan metanan.
Di dos dia
Dia 2 di october e programa a continua cu un excursion pa De Slufter, cu a keda organisa den colaboracion cu Vogelinformatiecentrum Texel y Staatsbosbeheer. Durante e excursion Texel su acercamento riba tereno di manejo di naturalesa y proteccion di areanan vulnerabel di costa a bini dilanti.
Seguidamente E8 a yama bon bini na miembronan di Segunda Camara (Tweede Kamer), entre otro miembronan di e comisionnan fiho pa Infrastructura y Manejo di Awa, y Relacionnan den Reino. Den su discurso gezaghebber Alida Francis a describi tres prioridad importante cu a bini dilanti for di e deliberacionnan cu E8: inversion igual, capacidad di ejecucion local mas fuerte y mas accion di clima. El a enfatisa cu trato igual no tin mag di nifica cu ta aplica manejo di tera firme uniformemente na e islanan, pero cu mester logra resultadonan husto cu ta tene cuenta cu nan grandura, nan realidad logistico y nan structura di gasto unico. Gezaghebber Francis a mustra tambe riba e desafionan cu e gobiernonan di e islanan chikito ta confronta, entre otro medionan personal limita y acceso na experticio spesialisa, y el a pone enfasis riba e meester pa fortalece nan capacidad pa ejecuta manejo efectivamente. Pa loke ta trata resiliencia contra clima, el a haci un yamada pa mas atencion pa e ejecucion, caminda el a subraya cu mester wak mas leu cu solamente estrategia: “turn paper into practice – comberti papel den practica”.
Pa duna forsa na e prioridadnan conhunto aki, ‘burgemeester’ Mark Pol di Texel y gezaghebber Francis a entrega un borchi na e miembro di Segunda Camara Heera Dijk, riba cual por mira e tres mensahenan nucleo di E8. Dijk a ricibi e mensahe conhunto na nomber di e delegacion, huntu cu su coleganan Marieke Vellinga-Beemsterboer, Luciënne Boelsma-Hoekstra y Björn Schutz, y cu esaki e prioridadnan conhunto di E8 a keda entrega formalmente na Segunda Camara.
E ‘burgemeester’ di Schiermonnikoog, Henri Meendering, seguidamente a papia tocante e topico di siguridad di awa, entre otro e rol di sistemanan natural manera ‘kwelder’ pa proteccion di costa. Durante e discusion nan a para keta tambe na e relacion entre e funcionnan di rif di coral den area caribense y e medidanan di proteccion di costa na e ‘Waddeneilanden’.
Nan a clousura e programa di dos dia cu un bishita na De Schorren, bou di guia di Natuurmonumenten, y despues e participantenan a abandona Texel pa biaha pa Den Helder.
