HulandaFeatured

Diskurso di Prome Minister Mark Rutte na e 77 Asamblea General di Nashonan Uni: hipokresia I berdat na mes momento?

Pm Rutte Un.....

Nos a tuma nota di bo diskurso tokante e gera na Ukraina na e apertura di e 77 Asamblea General di Nashonan Uni, kaminda abo a subi e prestigioso esenario mundial di Nashonan Uni pa presenta akshonan I plannan pa futuro di bo gobierno.

Den nos bista I eksperiensa komo pueblo Boneriano ku a biba I soporta bo gobierno su aneksashon illegal ora ku a disolve Antia Hulandes na 10 oktober 2010, nos por bisa ku sertesa ku tur lokual ku su honorabel a ekspresa riba e esenario mundial aki ta eksaktamente den tur aspekto berdat pa nos pueblo Boneriano.

Den nos kontinou esfuersonan pa ekspone atrosidatnan Hulandes en buska di hustisia pa nos pueblo Boneriano, ku ta den proseso pa pone Bonieru bek riba lista di Teritorionan-Sin-Propio-Gobernashon di Nashonan Uni.  Pasobra nos no tin representashon ku pa para defende nos berdat i derechonan riba e esenario di Nashonan Uni, nos lo evalua e diskurso ku bo a duna. Nos lo hasi esaki ku palabranan direkto I kla, e mesun manera ku abo a ekspresa bo gobierno su punto di bista I plannan riba e konflikto na Ukraina. Bo honorable su vokabulario a shock nos, sitando bo mes palabranan, ”delirante, enganjoso I mentira kompleto”. I di otro banda nos a keda babuka pasobra bo a papia riba, libertad, outo-determinashon, estado di derecho, determina bo mes futuro, e pueblo su derecho pa skohe su mes kaminda, prinisipionan fundamental di e Karta di Nashonan Uni ets. Nos ta pensa PM Rutte ku bo diskurso ta hipokresia di nivel mas haltu pasobra e diskurso aki a wordu hasi na e nivel mas haltu diplomatiko di mundo, e Asamblea General di Nashonan Uni.  Nos evaluashon aki abao di bo diskurso ta solamente basa riba hechosnan, sitando bo mes palabranan.

Sitando Honorabel Ekselensia Mark Rutte:

PM Rutte speech NU: “nos tin hasi un eskoho entre abuso di poder ta korekto I un komunidat internashonal bibando na paz bao di leynan di hustisia…”

Nashonan Uni a deklara ku kolonialismo ta krimen kontra humanidat, awor dikon bo gobierno ta kontinua ta impone dor di abuso di poder leyan I manehonan kolonial riba nos isla Boneiru I e otro islanan Karibense? E ora ey ta dikon boso gobierno Hulandes a tuma over nos isla chiki Boneiru su aeropuerto internashonal I transforme I ekspande den tempu rapido sobrepasa normanan komersial supuestamente na normanan militar?

PM Rutte diskurso NU: “e pueblo solamente ke pa wordu laga na paz… pa disidi nan mes futuro…nos mester mantene estado di derecho… ta derecho fundamental di un pueblo pa skohe nan mes kaminda… ta trata di libertad…ku ta anhela pas I hustisia… kual nan bos no ta wordu skucha…”
Si asina mes PM Rutte, e pueblo Boneriano lo kier wordu laga na pas. Nos lo ke pa bo para e migrashon di Hulandes-Oropeo pa establese na Boneiru enkurasha pa bo gobierno ku insentivanan, depopulando I hasiendo e pueblo Boneriano un minoria riba su mes isla kaminda e imigrante Hulandes-Oropeo ora e yega por vota den 90 dia den elekshonan lokal di Boneiru. Boso gobierno a mantene boso mes na ley inernashonal I estado di derecho ora ku boso gobierno unilateralmente a aneksa I ankra Boneiru den boso konstitushon sin derecho igual I kontra di deseo di e pueblo?

PM Rutte speech NU:”nos mester defende e prinsipionan fundamental di e Karta di Nashonan Uni…. prinsipionan ku nos a akorda despues di lesnan doloroso di historia …pa para huntu defende loke nos a establese den Karta di Nashonan Uni… Den Haag, e kapital legal di mundu”

Si su honorabel ta realisa ku akshonan, desishonan, leynan I manehonan di bo gobierno riba nos pueblo ta violashonan di e prinsipionan fundamental I a resulta den rekolonisashon ku ta violashon di  artikulo 1, 55, 73 I 103 di Karta di Nashonan I resuloshonan 742, 747, 945, 1514 I 1541 ku ta affrima e derecho inalienabel di e pueblo di Boneiru di outo-determinashon? Bo ta na altura ku bo gobierno sistematikamente a trapa hala un banda varios instrumento internashonal di pueblonan: Karta di Nashonan Uni, Deklarashon di Dekolonisashon di Nashonan Uni, Tratado Internashonal di Derechonan Sivil I Politiko, Tratado Internashonal di Derechonan Ekonomiko, Sosial I Kultural, Tratado Internashonal kontra tur di tipo di Deskriminashon Rasial, Deklarashon di Derechonan di Pueblonan Nativo di Nashonan Uni ? Bo no ta na altura di investagshonan I raportnan di numeroso ekspertonan internashonal inkluyendo bo mes ekspertonan ku bo gobierno a kontrata, Hoogers,Oostindie I Veenedaal raportando e hecho atroz di  bo gobierno su kontinuashon ku gobernashon kolonial ku ta violando “ leynan internashonal di hustisia”?

PM Rutte speech NU:”ku ta anhela paz I husitisia….ku no por tin hustisia si responsabilisashon….esnan ku nan bos no ta wordu skucha”

E deklarashonan aki ta refleha eksaktamente nos realidat I situashon despues di e aneksashon illegal di 10-10-10, kaminda nos outonomia a wordu debolbe na nivel kolonial ku status di deber di paga belasting pero sin representashon kaminda ku ta Den Haag ta disidi I sin ningun responsabilisashon. Nos bos a wordu silensia awor I pa eternidat pasobra nos a bira minoria riba nos mes isla. Esaki pa medio di desplazamentu I redukshon pa medio di manehonan di kolonisashon-di-establesementu, e poplusahon nativo a kai bao di 40% den un dekada I lo kai te bao di un tersera di e populashon na 2030.

PM Rutte speech NU:”narativa delirante yen di mentira, engayoso…. mundo no por I no lo para ketu I hasi nada”

E deklarashonan aki ta e linea kora den nos historia kolonial I ku a kontinua te awe. Historia ta keda ripiti, pa e motibu ku nos a wordu kolonisa pa un di e nashonan-kolonisado di mas grandi di mundo I ku awe nos ta den e situashon aki pa motibo di e mentira Hulandes di mas grandi di historia. Na momento ku na 1955 Sr Johan Beyen komo Minister di Relashonan Eksterior asisti pa prome minister Sr Jonckheer a enganja Nashonan Uni ku nan tabata representa e pueblonan liber di Antia Hulandes, I asina Hulanda a wordu absolve di obligashon pa raporta I a kita nos for di e lista di Teritorionan-Sin-Propio-Gobernashon. Nos nunka a wordu dekolonisa I nunka tabata ni igual ni liber.

PM Rutte speech NU:”para na e banda robes di historia…nos lo kontinua riba e kaminda ey pasobra adaptashon ta den nos DNA…awor ta e momenta pa halsa bos, awor ta e momento pa ta na e banda korekto di historia”

PM Rutte bo gobierno a roba Bonaire I horta 200 miya nautico-marino Zona Ekonomiko Ekslusivo di laman Karibe for di nos pueblo sin tira ni un solo bala di skopet I sin drama sanger I enberdat abo I bo gobierno ta para na e banda robes di historia. Korsou, Aruba I Sint Maarten nan prome minister no por a papia, halsa na bos, pasobra komo nan mester a sinta I mira abo den e 77 Asamblea General provoka I deklara gera mundial na nomber di Karibe Hulandes. Asina tanto pa igualdat, asina tanto pa ta na e parti korekto di historia, asina tanto pa e berdat, honorabel prome minister Rutte.

James Finies Un

Related posts

Minister Xiomara Maduro di Economia ta informa: Cannabis medicinal lo por contribui na 10% di nos GDP segun estudio haci na 2018

EA News Author

Hendrik Tevreden (MEP) Stima bo mes y busca ayudo na momento cu bo ta sinti malo

EA News Author

Awe centro di Bario Dakota ta cumpli 47 aña di existencia

EA News Author

Leave a Comment

Whatsapp Message