Discucion entre AVP-Futuro ta continua pa loke ta trata HOFA y e bienestar general y di pais ta keda poni un banda.
Cu e reces tras di lomba, ainda no tin claridad di Gobierno riba e Ley di Reino HOFA.Mientras e discusion interno den e coalicion ta continua, falta transparencia riba e pasonan concreto cu nan ta tuma cu e ley peligroso aki. Of pa di 4 biaha nan ta bay informa pueblo ora e ta un “done deal” caba?
E falta di claridad aki ta alarmante, ya cu ta trata di e futuro di nos pais. E consehonan huridico riba e materia aki, ta conclui claramente cu: e ley di HOFA ta mara Aruba pa semper, ta mina nos Constitucion, y e palabracionnan tras di dje a wordo negocia bou presion.
Pa haci’e facil y cla pa tur ciudadano por compronde e peliger real tras di e ley aki, laga nos wak un biaha mas e tres puntonan clave:
1. E promesa di “temporalidad” no ta real, y no ta para den e ley
Pinta HOFA como un control temporal ta un ilusion. E ley ta stipula cu Aruba por pidi pa e supervision termina, pero ta Den Haag (Rijksministerraad) ta dicidi esaki. Sin derecho di veto ni poder di co-decision di nos parti, Hulanda por keda controla nos pa semper, aunke nos cumpli cu tur regla financiero aña tras aña.
2. E ley aki ta pasa riba nos orden constitucional
E structura aki tin un eror legal grandi: e ta duna e ministernan di Reino e poder pa tuma decisionnan interno riba nos pais, algo cu ta contra nos sistema di ley. Esaki sigur ta habri un porta hopi peligroso pa Hulanda sigui drenta sin permiso den teritorio y decisionnan cu ta pertenece solamente na Aruba su autonomia. Pakico nos a lucha pa nos Status Aparte, pa awor parcialmente entrega esaki bek?
3. E “consenso” no tabata liber, sino bou di presion
Pa un ley di Reino por conta como un producto di acuerdo mutuo, e mester nifica cu dos parti ta sinta na mesa como igual y ta dicidi libremente. Pero pa ta sincero desde inicio di Pandemia esaki no tabata e caso.
*Presion financiero: E interes mas abou ta wordo uza como un chantahe; si bo no firma HOFA bo no ta haya e interes abou (no ta haya placa fia). Esey ta negocia bou di presion, no cu boluntad liber.
*Acuerdo di pasado no por mara futuro: Un firma riba un papel (bestuursakkoord) di un gobernacion anterior pa negosha no por kita e autoridad di un Parlamento of Gobierno actual y futuro pa bisa cu nan no ta di acuerdo mas cu e producto final di e negociacion.
Conclusion
E alertanan aki no ta wega politico, sino advertencia serio di profesor- y expertonan di derecho.
Nos no por keda keto. E silencio y conflicto interno di Gobierno ta pone nos autonomia y democracia na peliger. Pueblo merece e berdad. Ta tempo pa Gobierno presenta na Parlamento y duna splicacion pa nos tuma e decision final.