Presidente di Parlamento di Aruba, Marlon Sneek, a ricibi e manifiesto entrega pa ex-mandatario Otmar Oduber y a confirma cu Parlamento lo atende debidamente cu e peticion aki. Sneek a aclaria cu e trabou y e discusion riba e tema aki a cuminsa caba desde e tempo cu Oduber tabata den Parlamento como lider di fraccion di PPA, unda tabatin un consenso den e Comision Huishoudelijk di Parlamento pa busca orientacion huridico.
Segun Sneek, e meta principal ta pa percura cu e procesonan di investigacion ta transparente y cu ta duna garantianan legal husto, evitando cu investigacionnan penal contra politiconan of mandatarionan ta drenta sin un base.
Parlamento a manda e documentonan di e propuesta aki na nan departamento huridico pa haya un aprecio y determine e miho forma pa encamina e ley, garantisando e procesonan legal y e transparencia necesario.
Sneek a señala e duda cu ta existi den comunidad y e ambiente politico ora investigacionnan ta cuminsa a base di rumor of simpel publicacionnan riba rednan social, pa despues bay busca prueba pa hiba un politico dilanti mesa berde.
El a enfatisa cu garantisa e proteccion aki ta fundamental pa stimula hobennan y profesionalnan bon prepara pa drenta den servicio publico y sirbi nan pais sin e miedo cu nan por wordo ataca of perhudica inmensamente pa motibo di e funcion cu nan ta ocupa.
Tocante e hecho cu e ley aproba aña pasa no a drenta na vigor ainda, e Presidente di Parlamento a splica cu esaki ta pasa hopi biaha. Ora un ley of amendamento yega na Gobierno, esaki ta wordo manda pa evaluacion huridico pa determina si ta recomendabel pa mande pa Gobernador pa firma.
Marlon Sneek a conclui reafirmando cu Parlamento lo continua cu su responsabilidad pa percura cu politiconan ta haya un tratamento legal husto y no wordo abusa simplemente pa e echo cu nan ta encarga cu un funcion politico.