E homber cu den fin di siman a busca y hiba e hobencita Carolina Kock di 15 aña sin trece esaki bek su cas, ta den problema serio ya cu e por wordo acusa di diferente delito serio cu por mand’e prizon pa hopi tempo.
Algun informacion cu tin di e caso aki ta cu aparentemente e homber aki cu probablemente ta mayor di edad, segun un post cu tata di e hobencita aki a ricibi for di amistadesnan cu a reconoce su yiu ta mustra cu esaki ta e mes un persona den e auto cu a bin busca su yiu, ta trata aki di un auto cora.
Segun e informacion cu e tata trace na nos mesa di redaccion ta mustra cu e su yiu muhe Carolina tin solamente 15 aña di edad, pues e mucha muhe ta un menor di edad y cu e mucha muhe no a regresa cas bek e anochi despues henter e famia ta preocupa ya cu no por localisa e mucha via di su celular.
A haci un suplica na comunidad pa yuda den buskeda di e mucha muhe aki, cu famianan ta buscando den forma desespera pa sa kico ta pasando cune y si e ta bon.
Mientras tanto na momento cu a bay polis , polis a avisa cu mester warda e mucha bin cas pa despues tuma un keho. Sin duda ta un violacion serio cu e homber cu a busca e mucha aki, ta ser confronta cune.
Ta spera cu tanto e mucha muhe pero principalmente esun cu a bin busca e juf na su cas, realisa e situacion cu nan a hinca nan mes aden y si e mayornan a haci denuncia caba di e hecho aki pa asina autoridadnan hudicial actua contra di e persona menciona.
Pa algun tempo caba casonan di abuso sexual of relacion sexual cu menornan di edad ta tumando luga, mucho mas cu antes pero parce cu tin hende cu no a compronde seriedad di e asunto aki caminda un persona cu tene relacion sexual cu menor di edad, lo por haya varios aña di castigo den prizon.
Principalmente den ultimo lunanan tin varios caso cu a bin dilanti caminda hendenan grandi a ricibi castigonan di prizon cu ta varia entre dos pa cuater aña di prizon pa motibo di a tene relacion cu menornan di edad.
Esun cu ta pensa cu e relacion sexual aki tabata cu consentimento mutuo esey lo a libra nan di cualkier culpabilidad, ta hopi ekiboca ya cu e hende mayor di edad lo keda responsabel, sea cu e relacion ta mutuo of no, cu e la comete un violacion serio di ley pa tene relacion sexual c’un menor di edad cu segun ley su persona tin cu proteha.