Historia politico di Aruba ta marcando un di su paginanan mas scur. Segun e ultimo declaracionnan y postura di Minister Geoffrey Wever, pa cualkier motibo of gasto, e prijs di combustibel na Pais Aruba mester subi, uzando salariominimo pa subi. Un posicion drastico cu ta manda un señal cla y destructor: e pueblo tin cu sigui carga e piso di decisionnan descuido mientras costo di bida ta wordo hinca mas profundo den e abismo.
Un Patron di Arogancia y Cambio di Discurso
E actitud aki no ta un hecho isola. Ta e mesun patron di inconsistencia cu e mandatario aki a mustra ora e tabata den e gobierno anterior di MEP-RAIZ caminda e tabata rechasa e BTW—mientras cu awor den e coalicion nobo e ta un di e principal promotornan pa introduci esaki cu forsa.
Awor, cu e mesun postura menasante di laga un gobierno cay, e ta impone medida riba salario minimo,sabiendo perfectamente cu, den e realidad economico actual, esaki ta traduci directamente den un subida drastico di prijs di tur articulo y cuminda di prome necesidad. Tras di un “cara di lamchi bunita”, e realidad cu hopi ambtenaar y su propio coleganan ta biba diariamente tras di cortina ta un di cansancio y harta di un estilo di goberna personalista, caminda e interesnan individual ta pasa riba e bienestar colectivo.
Cuestionamento di Bon Gobernacion y Legalidad
E situacion aki ta pone den duda e mesun principionan di Bon Gobernacion (Good Governance). Con por ta posibel cu un coalicion completo ta permiti pa e situacionnan dañino aki sosode sin cu tin un minister of parlamentario cu e curashi legal y politico necesario pa para firme pa Pais Aruba?
Ta di lamenta cu, den luga di ehecuta e mando constitucional di sirbi e pueblo na prome luga, e prioridad di hopi parlamentario aparentemente a bira e proteccion di e stoel, e beneficionan personal y e posicionnan di poder. E falta di un marco legal fiho y transparente manera e falta di e mecanismonan di control di e ley di LIM ta haci cu e gobierno aki ta actuando al limite di e marconan di ley, faltando e debido proceso y e transparencia cu e ciudadano tin derecho riba dje.
Marionetanan y e Politica pa Interes Propio
E siguidonan (Followers) den parlamento di e coalicion figuranan den AVP y e fraccion di FUTURO, menos Mike de Meza ta hunga un rol di simpel , marionetanan den e escenario aki. E practica di priorisa e “saco propio” mientras e pueblo ta keda sacrifica ta un berguensa nacional.
E reunion publico ultimo den Parlamento a laga un solo cos cla: Aruba ta presenciando un di e gobiernonan mas debil y cuestionabel di su historia. Parlamentarionan cu a huramenta pa defende e pais aki ta opta pa sostene decisionnan cu ta kibra e poder di cumpra di e ciudadano, demostrando cu e berdadero balor pa e pais a keda un banda, y cu e unico cos cu ta conta ta e continuidad di e poder politico a costo di e sufrimento di henter e pueblo.