Dia pa dia ta bira mas bisto cu algun comerciante ta kere cu pasobra nan tin un bar of restaurant canto di lama, e beachnan ta bira nan propiedad priva. Esaki ta completamente eróneo: tur beach na Aruba ta un espacio publico!
Lamentablemente, ainda falta e controlnan debido pa regula e ponemento di mesa y stoel riba e beachnan publico aki. E falta di supervision ta permiti cu e abusonan aki ta sigui tuma luga tur dia den diferente area turistico.
Den e caso specifico aki, un bar canto di beach a appropia su mes di e area comercializand’e manera ta di dje.
Riba top di esaki, e propio trahadornan ta insisti cu e beach ta priva.
Esaki ta lanta e pregunta: Kico gobierno ta haciendo al respecto? Unda e zona publico di e prome 10 meternan for di lama a keda? Esaki ta un situacion inaceptabel. Acaso gobierno a bende e beachnan di Aruba sin cu pueblo sa?
