Pa prome biaha por wak e acto cu a impresiona e juradonan di ‘America Got Talent’ na Aruba
Recientemente durante un conferencia di prensa, Diego Jaramillo, director di RCC Aruba a anuncia cu door di hopi demanda di nos comunidad, e acrobatistanan ta bay presenta nan acto cu nan a impresiona e juradonan di America Got Talent aki na Aruba.
‘Cinema Stars’
Esaki lo bay ta riba diabierna 11, 18, 25 di november y 2 di december 2022. E acrobatistanan a prepara un bunita show ‘Cinema Stars’ durante cual nan lo bay haci e acto tambe cu nan a clasifica cune den e show popular ‘America Got Talent’. ‘Cinema Stars’ lo cuminsa 7’or di anochi y lo ta den Paseo Herencia Ballroom. Ticketnan ta costa 45 florin y ta obtenibel na…..
Presentacion y logronan di RCC Aruba
Durante e conferencia di prensa sr. Jaramillo a splica cu RCC Aruba ta consisti di bailarinnan Arubiano y acrobatistanan Colombiano, Cubano y Venezolano. Acrobatistanan di varios pais internacional cu a haci Aruba nan cas y cu ta stima Pais Aruba. Unda cu nan bay den exterior nan ta promove Aruba cu hopi orguyo. RCC Aruba ta duna presentacion den varios hotel na Aruba for di aña 2010. RCC Aruba a participa pa prome biaha na un festival di Circo internacional ‘China International Circus Festival’ y a presenta na diferente cuidad na China. Aña pasa RCC Aruba a duna mas di 60 presentacion na Budapest, Hungria. Na comienso di e aña ki nan a participa na un otro festival di Circo renombra mundialmente ‘Circo Budapest Circus Festival’ na Hungria y a gana e premio di brons y tambe un premio special, como e grupo cu mas a impresiona e audiencia. Desde e presentacion aki RCC Aruba a ricibi varios contrato pa sigui presenta den exterior. Na luna di augustus y september RCC Aruba a participa na ‘Summer Circus & Water Spectular’ den Hippodrome Circus na Londres, Inglatera.
Presentacion local specialmente pa pueblo di Aruba
Actualmente e artistanan ta bek na cas, dunando nan shownan den hotelnan y a ricibi hopi peticion di nos comunidad pa wak nan acto cu nan a clasifica cune den ‘America Got Talent’ en bibo. Pa complace e tantisimo peticionnan pa presenta un show localmente e artistanan la prepara un show unico ‘Cinema Stars’, cu artistanan local y internacional riba e cuatro diabiernanan cuminsando dia 11 di november.
Futuro presentacionnan den exterior
Sra. Yamila Alvarez, directora di RCC Aruba a informa cu despues di e show ‘Cinema Stars” e artistanan lo biaha pa exterior. Durante cual nan lo bay duna presentacion den ‘Flic Flac’ The Modern Art of Circus, na Kassel, Alemania den lunanan di december 2022 y januari 2023. Tambe na januari 2023 riba invitacion di Italia, nan lo bay participa den ‘e show di Italy Got Talent’. Na tur show cu RCC Aruba haci, nan ta representa y promove Aruba. Den tur nan presentacionnan den exterior nan ta carga e bandera cu hopi orguyo.
Invitacion na pueblo di Aruba
RCC Aruba ta invita comunidad di Aruba, pa bin disfruta di nan show ‘Cinema Stars’ y relaha despues di un siman di trabou. Si tin compania of negoshinan cu kier bin disfruta di e show hunto cu nan personal tambe por haci esaki y manda un email na rccaruba@hotmail.com. Pa esnan cu kier wak e show, cumpra ticket tempran paso ticketnan ta limita. RCC Aruba a gradici Paseo Herencia y TGY Friday pa tur cooperacion ricibi pa por a tene e Conferencia di Prensa.