Aruba Hotel & Tourism Association (AHATA) ta acumula e cifranan di ocupacion y prijs di hotelnan tur luna y CEO di AHATA, Tisa LaSorte, ta anuncia cu na September e patronchi a continua cu RevPAR a crece pa motibo di prijs mas halto di camber cu menos ocupacion compara cu resultado historico.
SEPTEMBER 2023:
- Ocupacion: E grado di ocupacion tabata 71%; cual ta casi mescos cu grado di ocupacion na September 2022 y 9% menos cu 2019.
- ADR: E balor averahe di cada camber bendi tabata $268.48; un aumento di 5% compara cu September 2022.
- RevPAR: E entrada averahe pa tur camber disponibel tabata $191.69 cual ta 4% mas cu na 2022 y 16% mas cu na 2019. RevPAR ta e indicador di e resultado financiero prome cu desconta gastonan operacional y impuesto.
JANUARI – SEPTEMBER 2023:
- Ocupacion: E ocupacion averahe di prome 9 luna tabata 78%; un aumento di 6% compara cu e mesun temporada na 2022. (Nota: Den prome kwartaal di 2022 Aruba su turismo tabatin efecto di COVID).
- ADR: E balor averahe di cada camber bendi tabata $343.34; cual ta 13% mas cu mesun temporada na 2022.
- RevPAR: E averahe di prome 9 luna tabata $267.16; 19% mas compara cu e mesun temporada na 2022.
PROYECCION:
Proyeccion actual pa ocupacion averahe di hotel pa October ta 73%, November ta 77%, y December ta 79%. E expectativa pa ful aña 2023 su ocupacion ta 78%, cual ta representa un reduccion di 7% compara cu e averahe di aña 2019.
TIMESHARE:
Ocupacion na propiedadnan Timeshare tabata 78% na September 2023.
