Den e último simannan, vários organisashon den Karibe a keda afektá pa atake sibernétiko serio, manera ‘ransomware’, vírus, i problema tékniko grandi di kòmpiuter. E konsekuensianan tabata drástiko: paro di trabou pa vários dia, pèrdida di datonan krusial di negoshi, daño na relashon entre organisashon i kliente, daño na reputashon, i den algun kaso pèrdida finansiero grandi ku por a yega te na dies mil dòler.
E tim di krímen sibernétiko di Kuerpo Polisial Hulanda Karibense (KPCN) ta traha huntu ku diferente partner pa inventarisá e atakenan aki i ta duna un atvertensia pa e menasa ku a oumentá. “Krímen sibernétiko no ta un menasa leu mas, e ta un realidat den nos region.” e tim ta deklará. “Nos ta hasi un yamada na organisashonnan pa kontrolá i fortifiká nan seguridat digital.”
Konseho: Kuater paso pa protehá bo organisashon
Mantené sistemanan aktualisá:
Sòru pa firewalls, sistema di operashon i ekipo semper ta disponé di e aktualisashon masresiente.
Segmentá retnan ku firewalls pa limitá propagashon di malware.
Sera portanan innesesario pa pafó.
Implementá bon sistema pa detektá i monitoriá.
Protehá kuentanan ku método di akseso fuerte:
Usa Autentifikashon Multi-faktor (MFA) pa tur kuenta di kompania.
Pone un kontraseña úniko di mínimo 20 karakter, inkluso lèter kapital, number i karakter spesial.
Evitá di bolbe usa e mesun kontraseña dor di hasi uzo di un ’password manager’, sigur pa atministradó di sistema.
Entrená bo empleadonan:
Hasi seguridat sibernétiko un tema di diskushon i organisá entrenamentu regularmente.
Siña empleadonan pa rekonosé ‘phishing’ i meil sospechoso i pa raportá nan.
Ehekutá kampaña di práktika, manera simulashon di ‘phishing’.
Sòru pa un plan di akshon ora tin insidente:
Dokumentá kiko mester hasi ora un insidente sibernétiko sosodé.
Traha un lista di number di telefòn ku dato di kontakto importante.
Warda ‘logfiles’ i evidensia na un lugá seif promé ku kuminsá ku trabou pa restablesé e sistema.
Determiná adelantá ken lo tuma desishon durante un krísis i práktika e senario aki.
Reportá insidentenan sibernétiko
Bo a bira víktima di un atake sibernétiko? No sinti bèrgwensa. Dor di reportá esaki bo por yuda otro organisashonnan pa ta alerta. Reportá insidentenan na warda di Polis na Playa òf manda un meil na cybercrime@politiecn.com. KPCN por yuda bo i pone bo den kontakto ku partnernan spesialisá.
Pa mas informashon i konseho práktiko:
pa negoshi chikí i independiente: www.digitaltrustcenter.nl/starten
Nationaal Cyber Security Centrum (Ministerio di Hustisia i Seguridat)
prinsipio básiko pa organisashon grandi i gobièrnu: www.ncsc.nl/basisprincipes