Kombatí pobresa riba Boneiru ta un di e puntonan di lansa di tantu gobernashon Rutte III i awor Rutte IV, tambe den e Akuerdo Intergubernamental 2018 – 2022 (“Bestuursakkoord”) i den e Programa di Gobernashon UPB/MPB 2019-2023. Esaki ta un di e metanan prinsipal pakiko a skohe pa Laso Direkto na 2004 (18 aña pasá); pa e siudadano boneriano por a yega na un nivel di bida aseptabel kompará ku Hulanda. Mester a yega na un nivel komparabel di suèldu mínimo, di ònderstant i penshun di behes. Konseho Insular di Boneiru a laga traha un rapòrt NIBUD pa bin ku sifranan kon e situashon di pobresa realmente ta riba nos isla. Hulanda mes a laga traha un rapòrt Regioplan ku tambe, meskos ku NIBUD, a konstatá ku 40% di nos poblashon ta biba den pobresa. Defensor di pueblo a deklará ku ta un bèrgwensa pa gobernashon na Den Haag pa ta usa argumentonan ku el a yama engañoso i nònsèns pa no stipulá un eksistensia mínimo. Sektornan sosial den nos komunidat a i ketu bai ta alsa nan bos i ta boga pa stipulá un eksistensia mínimo pa asina saka nos poblashon for di den pobresa. Aña pasá partnernan sosial den Diálogo Sentral unánimamente a yega na e Akuerdo di Kralendijk i a presentá un proposishon konkreto na gobernashon di Den Haag pa den 4 aña oumentá e suèldu mínimo pa asina por yega na un nivel di eksistensia mínimo aseptabel na Boneiru, kaminda esnan ku ta kobra ònderstant i penshun di behes por a yega na 70% di e suèldu mínimo, kual ta e mesun sistema ku ta usa na Hulanda pa paga ònderstant i AOW. Medionan di komunikashon hulandes a bin traha tantu reportahe aki na Boneiru pa ilustrá e pobresa ku tin riba nos isla. A konstatá ku ta e gastunan haltu mensual di kada kas ta pone ku e entrada di asta esnan ku ta traha no ta alkansá pa kubri esakinan i ku en bèrdat ya for di banda di dia 10 di luna e pòtmòninan ta bashí. Sekretaria di Estado Tamara van Ark a bin ku e proposishon pa stipulá un eksistensia mínimo na 70% di loke Regioplan a proponé i ku banda di subi e entrada, gobièrnunan di Hulanda i Boneiru mester hasi nan máksimo esfuerso pa baha i mantené e gastunan mensual di famia strukturalmente abou.
Un di e gastunan ku ta pisa riba e pòtmòni ta esun di awa i koriente. Hulanda a duna un alivio den esaki, dor di supsidiá parti di e gastunan aki di moda ku awa i koriente a keda pagabel pa nos komunidat. For di luna di yüli 2021, Hulanda a anunsiá ku entrante 1 di yanüari 2022 e lo no duna WEB e supsidio aki mas i ku tur hende mester bai paga nan resibu di awa i koriente normalmente. WEB na su turno a splika ku banda ku nan no ta haña e supsidio aki mas for di luna di yüli aña pasá a oumentá nan tarifanan i ku na luna di yanüari 2022 e tarifanan lo bolbe oumentá. Gobièrnu di Boneiru a disidí ku pa luna di yüli 2021 nan ta tuma tur e oumento pa nan kuenta i a paga esaki na WEB. Sinembargo esaki no tabata un solushon struktural, ya ku e lunanan despues, esta ougùstùs te ku desèmber 2021 gobièrnu no a paga e oumento akí mas ni a krea ningun solushon pa e oumento ku lo a yega na yanüari 2022. Gobièrnu Hulandes te awe no a reakshoná positivo riba petishon di WEB (sostené pa tur partner sosial) pa risibí un finansiamentu di 32 mion dòler pa nan plan pa oumentá produkshon di energia di bientu i solo te ku 90% i asina riba término baha e resibu di awa i koriente te ku 50% di e preis aktual. I awe e realidat duru akí a bati na porta di henter komunidat i nos tur ta eksperensiá ku henter e maneho di baha gastu i subi entrada no ta duna resultado. Inflashon a kome 4.3% di e oumento di 10% di suèldu mínimo entrante 1 di yanüari 2022: kosto di bida a subi ku 4.3% pues e trahadó no ta haña den su man 10% di oumentu sino 5.7%. No a oumentá e ònderstant te na 70% di e suèldu mínimo tampoko. Tur hende ku dos plaka di sintí ta komprondé ku e maneho aki nunka lo por tin komo resultado baha pobresa riba nos isla, al kontrario; e maneho aki ta konsolidá e pobresa i asta ta oumentá esaki. Ayó tur e promesanan di nivel sosial aseptabel, ayó e gritunan di yena pòtmòni. Loke si nos ta konstatá riba nos isla ta, ku dia pa dia e buraku entre esnan ku tin i esnan ku no tin ta birando mas grandi. Ku otro palabra na un banda ta mira desaroyo pa sierto gruponan den nos komunidat miéntras ku ketu bai 40% di nos komunidat ta sak bai mas hundu den pobresa.
Esaki ta pone ku mas i mas tin e nesesidat pa nos lidernan sinta na mesa i evaluá e kontenido di nos struktura estatal ku te awor no a duna e resultado deseá. Pa kolmo nos ta bai haña un Sekretario di Estado ku no tin ningun konosementu di nos situashon, pues atrobe mester bai na “werk su mes in” ku e konsekuensia ku hopi tempu balioso ta bai pèrdí. Ta pará den e Akuerdo di Koalishon ku lo bai traha na “igualdat” entre Hulanda Oropeo i Hulanda Karibense, pero den práktika esaki no a resultá. E gobernashon aktual na Boneiru mester mustra mas kurashi i enfrentá Hulanda ku e realidat aki. Un gobièrnu no por sinta man krusá mira su pueblo sufri di e forma aki. Ku ki kara ta bai pidi e pueblo otro aña un voto di konfiansa. A yega e ora pa pueblo sinti ku berdaderamente tin lidernan ku ke hasi e diferensia.