E lider di fraccion di Partido di Pueblo Arubano (AVP), Jennifer Reyes, a compartí un resumen amplio di e puntonan di mas importante cu a wordo trata durante e reciente reunion Tripartiet. Entre e temanan di agenda cu a destaca ta structuralisacion di e Geschillenregeling (Regulacion di Disputa), e futuro monetario di e islanan Corsou y Sint Maarten, y e formanan den cual Reino lo mester duna contenido na e herencia di sclavitud (Slavernijverleden).
Un di e temanan di mas peso riba e agenda tabata e trayecto pa por fin yega na un Geschillenregeling pa Reino, un proceso cu, segun Reyes, tin casi 16 aña ta canando.
Reyes a enfatisa e importancia pa e biaha aki si yega na un producto concreto y entregabel, specialmente awor cu e trayecto aki mester wordo presenta na Hulanda. Den e cuadro aki, e parlamentario a splica cu mester percura pa tin un verslag structural.
“Corsou y Sint Maarten tin un rol caminda nan por duna nan input. Kisas tin puntonan cu nan kier mira diferente, pero e meta principal ta pa nos yega na otro, pa asina na final di dia nos tin un producto unifica,” Reyes a declara.
Aruba, representando e petit comité cu ta inclui diferente miembro di Parlamento, a ricibi conseho valioso for di e Conseho di Estado di Reino (Raad van State van het Koninkrijk). Actualmente, e islanan ta trahando riba un draft comun, sperando riba e reaccion di Corsou y Sint Maarten pa determina con por sigui avansa formalmente cu e trayecto aki.
Un otro punto relevante tabata e presentacion di Corsou y Sint Maarten tocante nan Union Monetario. E dos islanan a presenta un relato di prensa conhunto basa riba un investigacion realisa pa Profesor Winter. E studio aki ta analisa e proposicionnan y e caminda cu e islanan, hunto cu nan Banco Central, por tuma den futuro.
For di perspectiva di Aruba, Reyes a probecha pa comparti e experencia positivo di e isla teniendo su propio Banco Central autonomo. E lider di fraccion a resalta e beneficionan den bista di Aruba, specialmente riba tereno di:
Supervision financiero y regulacion di banco- y companianan comercial.
Control riba rentanan y e maneho di fondonan di pension.
E rol crucial di e moneda nacional (Florin) mara na e Dollar Americano.
Cumplimento (compliance) cu e normanan internacional.
Basa riba e experencia exitoso aki, Aruba a recomenda e modelo di un banco central propio na e demas islanan di Reino.
Pa locual ta trata e tema di e Pasado di Sclavitud (Slavernijverleden), Reyes a splica con Aruba por desaroya proyectonan pa asina beneficia di e fondonan cu Hulanda a pone disponibel. E fondonan aki por wordo inverti den restauracion di monumentonan historico manera e Willem III Toren y Fort Zoutman.
Ademas, lo habri un ‘open call’ (yamada habri) dirigi na diferente NGO (organizacionnan no-gubernamental) pa nan forma parti di e proceso di pensamiento. E meta ta pa dicidi con lo duna un contenido profundo y significante na e dia conmemorativo di 1 di Juli (Dia di Abolicion).
Reyes a subraya cu e discusion mester bay mas leu:
“Nos mester pensa den ki forma nos como pais Aruba kier mira e topico aki wordo carga, pa asina e pueblo tambe por sinti esaki como un inversion den educacion y den identificacion di nos propio identidad.”
Pa conclui, Reyes a referi na e expresionnan cu sa wordo benta den direccion di e islanan door di algun miembro di Tweede Kamer na Hulanda. E lider di fraccion a expresa cu Aruba ta prefera un enfoke hopi mas diplomatico.
E isla ta boga pa un ambiente di respet mutuo caminda por expresa opinion y diferencianan sin cay den confrontacion, reconociendo semper cu e islanan den Caribe ta parti fundamental di e Reino Hulandes.