Representantenan di Aruba, Bonaire, Curaçao, Saba, Sint Eustatius y Sint Maarten a firma diabierna un Memoria di Comprendemento (MoU) renoba, cu e meta pa fortalece e cooperacion regional den agricultura, cria di bestia y pesca den henter Caribe Hulandes.
E acuerdo a wordo firma den e cuadro di e Aliansa di Agricultura, Cria di Bestia y Pesca di Caribe Hulandes (DC ALFA) y ta marca un paso importante pa formalisa mas ainda e colaboracion a largo plaso entre e seis islanan den areanan manera siguridad di cuminda, agricultura sostenibel, desaroyo di pesca, resiliencia contra cambio di clima, y coordinacion di maneho regional.
E firmatarionan di e acuerdo tabata Minister di Finansa, Asuntonan Economico y Sector Primario di Aruba, Geoffrey Wever; Comisario di Bonaire, Clark Abraham; Minister di Salud, Medio Ambiente y Naturalesa di Curaçao, Tyrone Boekhoudt; Comisario di Saba, Bruce Zagers; Comisario di Sint Eustatius, Rechelline Leerdam; y Vice-Prome Minister y Minister di Turismo, Asuntonan Economico, Transporte y Telecomunicacion (TEATT) di Sint Maarten, Grisha Heyliger-Marten.
E MoU actualisa ta traha ariba e prome acuerdo firma na 2023 y ta stipula un cuadro mas structura y orienta hacia futuro pa cooperacion te cu aña 2035.
E acuerdo ta refleha un compromiso comparti entre e islanan participante pa fortalece siguridad di cuminda, reduci e depencencia di importacion, Promove practicanan sostenibel y inteligente structuralmente adapta na e clima, stimula crecemento economico resiliente, y aumenta oportunidadnan pa hoben- y muhernan den e sector primario.
E cuadro renoba aki ta duna apoyo tambe na e desaroyo continuo di e ‘DC ALFA Roadmap 2025–2035’, cual lo guia e colaboracion regional y e prioridadnan strategico den futuro.
Un componente importante di e acuerdo nobo aki ta e intencion pa traha riba formalisacion di DC ALFA pa bira un entidad legal independiente, capas pa duna apoyo na structuranan di gobernacion mas fuerte, haya acceso na oportunidadnan di financiamento externo, y facilita e implementacion di proyectonan regional a largo plaso.
Papianan na momento di e firma, Minister Heyliger-Marten a enfatisa e importancia di colaboracion regional pa fortalece siguridad di cuminda y sostenibilidad economico den Caribe Hulandes; trahando hunto colectivamente den mas cu un solo forma.
“Cooperacion regional ta esencial ora nos ta traha pa fortalece siguridad di cuminda, apoya productornan local, y crea sistemanan di agricultura mas innovativo y sostenibel den henter Caribe Hulandes. E asosiacion renoba aki ta permiti nos comparti conocemento, alinea esfuersonan, y habri miho oportunidadnan pa e generacionnan binidero. Ban sigui haci e industria aki uno atractivo pa tur hende,” e Minister a declara.
E Memoria di Comprendemento a drenta na vigor inmediatamente despues di e firma y lo keda valido te cu dia 31 di december 2029.