Dia Mundial di Futbòl 2026 a marka un momento spesial i memorabel pa James Finies, Fundadó di Bonaire Human Rights Organization i anterior hungadó di futbòl Nashonal di Antias Hulandes, ora ku el a topa ku Presidente di FIFA, Gianni Infantino, durante e Resepshon di Alto Nivel na Nashonnan Uní organisá pa e Mishon Permanente di Qatar na Nashonnan Uní.
Pa James Finies, futbòl semper tabata su gran pashon. El a kuminsá komo hungadó den selekshonnan juvenil i despues pa dekadanan a representá Bonaire den tur selekshonnan di futbòl, i tambe tabata hungadó den selekshon Nashonal di Antia Hulandes. Despues di su karera den futbòl, el a trese e mesun disiplina, dedikashon i espíritu di lucha komo defensor di derechonan humano, dedikando su bida kompleto na lucha pa derechonan di pueblo Boneiriano despues di e disolushon di Antia Hulandes na 2010.
FIFA World Cup 2026 di e aña aki tin un nifikashon spesial pa James Finies, spesialmente awor ku nos isla ruman Kòrsou, komo e pais mas chikí na populashon den historia di munda ku a logra klasifiká pa e torneo di futbòl mas grandi di mundu i a hasi historia riba esenario mundial. Finies semper a kere i animá su kompanjeronan ku nos islanan tin e talento pa yega na nivel mundial, i e logro históriko di Kòrsou ta prueba ku asta nashonnan chikí por subi te na e esenario internashonal mas haltu dor di nos talento, determinashon i perseveransia.
Na Nashonnan Uní na New York, e FIFA World Cup 2026 tambe a tuma e sentro di atenshon ora ku Presidente di FIFA Gianni Infantino, Embajadór di Merka Mike Waltz, representantenan internashonal di alto nivel, i delegadonan di Canadá, México i Merka a pone enfásis riba e poder úniko di futbòl pa uni nashonnan, inspirá komunidatnan, i fortalesé koperashon internashonal.
Agregando mas balor na e okashon, balanan ofisial di FIFA firma a ser presentá durante e selebrashon, hasiendo e Dia Mundial di Futbòl 2026 un momento inolvidabel i di gran orguyo pa James Finies — un eks hungadó di futbol ku su trayekto ta sigui reflehá e konekshon duradero entre deporte, liderazgo i servisio na humanidat.
