Kongreso a duna bendishon pa aklamashon di Direktiva nobo pa period 2026 – 2028
partidonan MAN I PIN skibi un página nobo den historia polítiko di Kòrsou. Despues ku e partidonan MAN i PIN a partisipá na elekshon pa Parlamento na 2025 ku un lista kombiná di miembronan di e dos partidonan, a sigui un trayekto pa sigui fortifiká e proseso di kolaborashon.
Un di e puntonan den kuadro di e loke a menshoná aki riba, direktivanan di e partidonan a proponé na e diferente órganonan di e partidonan pa Partido PIN integrá den Partido MAN. Despues ku e diferente órganonan a bai di akuerdo ku e proposishon, riba 30 di mei 2026, durante un Kongreso di Partido e órgano aki tambe a bai di akuerdo ku e integrashon. Esaki ta nifiká ku lo partisipá na elekshon pa Parlamento na aña 2029 komo Partido MAN.
Dia 23 di novèmber 2023 partinan MAN i PIN a yega na un akuerdo inisial di koperashon for di e punto di bista ku union ta hasi forsa, i e konvikshon ku ménos fragmentashon den árena politiko lo benefisiá nos komunidat i lo duna mas balor na voto di e votadó. Despues di e akuerdo di kolaborashon di 23 di Novèmber 2023 a sigui un trayekto pa sigui fortifiká e kolaborashon ku a redundá den e akuerdo di 30 di Mei 2026 den kua Partido PIN ta integrá den Partido MAN. “E proseso pa sigui duna mas kontenido na e union no ta para aki, pero lo kontinuá segun un plan di vishon i akshon, presidente di Partido MAN, Keneth Gijsbertha a bisa.”
“Ku e elekshon di pa Parlamentario kua tuma lugá dia 21 di mart 2025, pueblo a duna a duna konfiansa na e lista MAN-PIN ku dos (2) asiento den Parlamento di Kòrsou.”
“MAN-PIN onrando e konfiansa i kumpliendo ku e responsabilidat ku e enkargo ta bin kuné, a traha ku un kompromiso ku pueblo, disipliná i amor pa nos pais. E frakshon a demostrá ku ora forsanan ta uní basá riba prinsipio, rèspèt, servisio na pueblo i inovashon, por alkansá resultadonan ekstraordinario.”
“Nos ta dal e siguiente paso inovativo; ku hopi orguyo nos ta anunsiá ofisialmente e fushon entre PIN i MAN. Miembronan i dirigentenan di PIN ta integrá den un (1) Partido. Partido MAN. Konsolidando asina un solo forsa polítiko, ku un vishon i un kompromiso ku Kòrsou.” “Nos frakshon den Parlamento ta sigui komo MAN-PIN te na próksimo elekshon.
E desishon aki no ta solamente un union polítiko. E ta un mensahe di madures, inovashon, responsabilidat i speransa renobá pa nos pueblo. Den un tempu kaminda hopi pais ta enfrentá divishon i polarisashon, MAN i PIN a skohe pa union i inovashon. Nos a skohe pa konstruí un futuro huntu. Nos a skohe pa pone interes di henter pueblo, sin ekskluí niun grupo, riba interes personal òf partidista.”
“Historia lo kòrda e momentu aki komo un akto di balentia i vishon. Eliminá fragmentashon polítiko no ta nifiká pèrdè identidat; e ta nifiká madures i un kompromiso komun. fortifiká propósito komun. E ta nifiká komprondé ku Kòrsou mester di movementunan fuerte, komprometé pa goberná ku seridat, stabilidat, koherensia ku ta traha pa logra resultadonan na bienestar di di nos komunidat den su totalidat.”
“Na tur miembro di MAN i PIN: e logro aki ta di boso tambe. Danki pa kere den diálogo, ku rèspèt mutuo i den e soño di un polítika diferente i prinsipalmente inovativo. Danki pa kana hunto ku konvikshon i dignidat.” e presidente a klousurá bisando.”
I na pueblo di Kòrsou: e union aki ta pa boso. Nos lo sigui traha sin deskanso pa un Kòrsou mas fuerte i inovativo, mihó oportunidat pa nos hóbennan, hustisia sosial, solidarismo, bon gobernashon i un pais kaminda kada siudadano por ta orguyoso di su futuro.
Ku nos bista fihá riba futuro, nos ta sigui bai dilanti uní, fuerte i prepará pa sigui sirbi e pueblo bou di e nòmber ku a marka historia polítiko di nos pais: MAN
Uní nos ta mas fuerte. Uní nos ta avansá. Uní nos lo konstrui futuro di Kòrsou.
Direktiva Partido MAN 2026-2028
Durante di e kongreso a instalá diferente komishon ku lo ta enkargá ku tareanan stipulá de statuto i reglamentu doméstiko. Alabes a skohe – pa aklamashon – direktiva pa periodo 2026 – 2028. E miembronan di direktiva ta: Kenneth Gijsbertha, presidente, Alvin Daal, vise – presidente, Yaël Plet, sekretario general, Lidushka Cijntje – Carolie, tesorero. Komo komisarionan a ser elegí: Angel (Jofi) Alavarez, Jourich Christina, Gianna Murray-Anastagasti, Evet Gomez-Wilson, Kenneth Martis i Vanessa Toré.
