Tambe tin e grupo di personanan cu ta den wega di number cu banconan local comercial tampoco no ta habri cuenta pa nan, consecuentemente e grupo aki tur luna loke nan ta bende nan lo mester warda e placa aki den kluis cu tur e consecuencia cu por crea espacio cu den e circuito criminal activa.
No ta desconoci cu miyones ta drei den sector di number na Curaçao pero lamentablemente nan no por tin un cuenta door di e situacion di Giro y e mal maneho di Banco central cu no a controla e caminda cu Giro tabata canando. Awe por bisa e consecuencia di esaki ta cu e ciudadanonan cu tabata cliente di Giro ta carga e consecuencia di erornan di maneho di tanto Banco Central Y Giro.
Tambe e otro banconan comercial no ta tuma e reto aki debi cu nan lo mester mantene nan mes na e reglanan di e headoffice di e banconan den exterior pa no atrae labamento di placa di wega di number debi cu nan no tin un cuenta , segun parlamentario Ramon Yung esaki ta simplemente e banconan ta tene nan mes na e Correspondent Bank nan di afo cu nan kier evita labamento di placa.
Tur e placa di e negoshinan di number actualmente ta drei den comunidad di Curaçao sin cu gobierno tin un bista con e placa ta circula realmente. Na mes momento kisas gobierno tin sumanan grandi di belasting pa cobra pero no por cobra esaki debi cu no tin un bista con e placa ta core den Pais Curaçao.
Segun Parlamentario Ramon Yun na momento cu Giro a cera y a bin cu Giro settlement holding pa un proposito special cu lo mester fungi manera un incassobureau pa cobra tur e placa di fiansa y hypotheek cu Girobank tin na cliente ainda. Asina a duna Giro settlement holding 15 aña pa cobra tur e personanan cu tin debe habri na Giro.
For di 2021 Giro settlement holding a cuminsa cobra e placanan aki y tambe den 15 aña mester paga Hulanda e fiansa di 170 miyon florin cu a haya fia di 0% di rente for di Hulanda pa por a paga e esunnan cu Giro debe di un suma di placa ta cu maximo di 1.2 miyon riba cuenta di giro.
Giro settlement holding for di 2021-2022-2023 ya a logra cobra 120 miyon y a paga esaki na Hulanda, esaki ta significa cu den 3 aña Giro a paga locual cu realmente na lo mester a paga den 11 aña. E calculacion tabata cu Giro settlement holding mester a paga 11.2 miyon florin tur aña pa paga e 170 miyon den 15 aña. Sinembargo den 3 aña nan a paga loke nan mester a paga den 15 aña.
E aña aki ta pre mira cu lo cobra atrobe un suma di alrededor di 20 miyon. Parlamentario Ramon Yun mirando e desaroyo aki y mirando cu e ta un fiansa di un interes di 0% e pensamento a bin pa dicon no uza e placa cu ta cobra e aña aki como un capital pa cuminsa cu ne pa por lanta un banco nacional cu na su turno por haci fiansa y duna credito chikito na e grupo specifico aki cu tabata cliente na Giro y cu ora nan ta den un necesidad cu nan mester fia un suma di placa chikito cu nan por haci esaki, pero na mes momento e ora e banco lo por haya un poco mas di ganashi y no di solamente di loke e ta acumulando di esunnan cu debe Giro actualmente via di un fiansa y of hypotheek.
Parlamentario Ramon Yun ta kere ta importante pa tene cuenta cu na momento cu caba di paga e 170 miyon florin na Hulanda , loke cu ta bay resta ta entre 30 pa 45 miyon. E suma di placa cu ta resta ainda mester paga e 30 cliente di Giro cu ainda no a haya nan placa. E suma total di e 30 persona nan aki ta papia di un suma di 301 miyon. Esaki ta significa cu e 30 pa 45 miyon ta entre 10 pa 15% di e suma total cu ainda mester paga e 30 cliente cu tabatin 301 miyon na Giro. Mirando cu tin un suma di placa cu ta cobrando y por saca mayor rendimento di dje y enbes cu na momento cu ta yega na final di e red y cu ta 10 pa 15 % so por paga e grupo ey bek mester por yega na un otro solucion pa e grupo por haya su placa. Parlamentario Ramon Yun ta kere cu mester cana e caminda pa habri un banco nacional pa por logra esaki.