Medlab a perde su caso LAR contra AZV. Hues a duna AFTA razon cu no por actua contra AZV.
Por a compronde cu Medlab no ta contento cu AZV ta duna laga laboratorio di Hospital y specialistanan haci testnan y no Medlab. El a haci keho na AFTA contra AZV pero AFTA a rechaza e keho. Medlab a bay cuminsa caso den Corte y Hues a duna AFTA razon cu no por actua contra AZV.
Noord Medical Center N.V., Medlab, a cuminsa un procedura contra (Algemene Ziektekosten Verzekering van Aruba) UOAZV (AZV). E motibo di e caso ta pasobra cu desde 2024, AZV a sera un acuerdo cu su clientenan ta haci testnan na laboratorio di Hospital. Esakinan ta testnan pa e di dos linea esta pa specialistanan y pa hospitalnan cu ta desea di haci test pa nan patientnan. Medlab, kende tambe ta duna servicio di laboratorio, no ta di acuerdo cu esaki. Medlab tambe kier duna su servicio di laboratorio. Ademas Medlab ta haya cu AZV ta fiha un tarifa mucho abao pa e promer linea di servicio di laboratorio cu Medlab ta ofrece na AZV.
MEDLAB TA KEHA AZV
Ta asina cu relaciona cu e situacion, Medlab a haci un keho na Aruba Fair Trade Authority (AFTA). Medlab ta haya cu AZV ta haci concurencia inhusto y Medlab a pidi AFTA pa actua contra esaki a base di e ley (Mededingingsverordening) (Mv).
AFTA TA RECHAZA KEHO
Ta asina cu AFTA, despues di haci evaluacion, a rechaza e keho di Medlab contra AZV. Segun AFTA, AZV no ta un empresa den e sentido di e ley Mv y door di esey AFTA no por actua contra e forma di opera di AZV.
MEDLAB CU CASO DEN CORTE
Ta asina cu Medlab no ta di acuerdo cu e decision di AFTA y a cuminsa un caso LAR contra e decision di AFTA. Medlab ta haya cu AZV ta comporta manera un empresa den e sentido di ley Mv, door di sera acuerdonan cu companianan cu ta duna servicio di cuido. Tambe Medlab ta mustra cu AZV ta stipula tarifa cu e ta paga.
CORTE TA RECHAZA KEHO DI MEDLAB
Ta asina cu Corte di Husticia di Aruba a trata e caso y recien Hues a dicta sentencia, caminda Hues ta bisa cu e ta comparti punto di bista di AFTA cu AZV no ta un empresa den sentido di e ley Mv. Hues den e sentencia ta mustra cu a check sentencianan di Hof di Union Europeo riba e concepto empresa. Hues ta haya cu e decision di Hof di Union Europeo tambe ta importante pa cu e concepto di empresa den e ley di Aruba Mv.
E sentencia di Hof di Union Europeo ta mustra cu cu organonan cu ta encarga cu ehecusion di aseguro medico cu ta basa riba solidaridad, no ta empresanan, pero ta wordo considera ehecutornan di e funcion di Gobierno.
Hues ta mustra cu AZV tin tur e indicacionnan di un sistema nacional solidario. Esaki por conclui for di e manera cu e aseguro ta fiha e tarifa pa cu e habitantenan, a base di nan entrada. Tur esaki ta a base di ley caminda legislacion no ta permiti concurencia ariba aseguro medico y AZV ta inclui den esaki.
Na opinion di Hues, e dunamento di contract na companianan di laboratorio y e forma con e tarifanan ta keda stipula, no ta haci cu por considera AZV un empresa. Pasobra AZV no ta un empresa den sentido di e ley Mv, AFTA no por actua contra AZV.
Hues ta haya cu AFTA a actua corecto di rechaza e leho di Medlab.
Ta asina cu e decision di Corte no ta definitivo. Partidonan tin e oportunidad di apela e sentencia. Esey mester sosode dentro di 6 siman.