Den preparashon pa e próksimo temporada di orkan, e destakamentu di Marina di Sint Maarten a partisipá na Caraïbes ‘26 siman pasá. Esaki ta un ehersisio bienal, na gran eskala den Karibe. E ehersisio, organisá pa Fransia, ta enfoká riba yudansa humanitario i operashonnan di yudansa den kalamidat.
Durante e di dos fase di Caraïbes, e Marinirnan di Sint Maarten a partisipá aktivamente. E entrenamentu tabata basá riba un senario realístiko: un orkan devastador a asotá e parti Franses di Sint Maarten. Den koperashon ku trupanan Franses i Colombiano, e Marinirnan di Sint Maarten a lokalisá e residentenan (simulá) i a evakuá nan pa un área sigur; tantu e barkunan rápido FRISC komo un helicopter Franses a keda desplegá pa transportá e heridonan rápido i sigur.
Danki na e bon koperashon entre Marina, e forsanan armá Franses, e unidad Colombiano, i e otro partnernan internashonal, e evakuashonnan di ehersisio a keda realisá eksitóosamente. Durante e entrenamentu, tur partisipante a kompartí informashon, a sostené otro durante transporte, i konhuntamente a kuida e víktimanan (simulá).
Kada dos aña, Caraïbes ta reuní vários pais i partnernan lokal di Caribe pa fortalesé e preparashon pa yudansa humanitario i reakshoná riba kalamidat den e region. E ehersisio ta proveé un ambiente realístiko den kua konosementu i abilidatnan ta wòrdu interkambiá i desaroyá mas aleu.
