Parlamentario John Hart ta pidi vragenuur riba revision di ley di LAP
“E bienestar di nos trahadonan mester ta un prioridad. Desde 2011 tin un ley pa regula e pensionnan pa sector priva, despues di 15 aña ta momento pa habri un debate den Parlamento di Aruba cu gobierno tocante e ley aki ,” asina Parlamentario di AVP, John Hart a declara.
Segun e evaluacion di Sociaal Economische Raad (SER) den 2017, e ley di pensioen general tin necesidad urgente pa un organo di gobierno cu ta eherce control. “Nos ta mira caso den corte caminda dunadonan di trabou ta retene e contribucion di pensioen for di salario di trahadonan, pero no ta deposita esaki na un fondo,” Hart a lamenta.
Pension ta un derecho pa cual trahadonan ta paga prima durante hopi aña, cu e speransa cu na un edad mas avansa nan por conta riba siguridad financiero y un bida digno. Precisamente pa e motibo ey ta di gran importancia cu e legislacion cu ta proteha e derechonan aki no solamente ta bon regula riba papel, sino tambe cu e ta funciona den practica. E señalnan cu a yega cerca mi durante e ultimo tempo ta indica cu tin deficiencianan den ehecucion, supervision di Landsverordening Algemeen Pensioen (LAP). Trahadonan no semper sa si nan primanan ta wordo paga, dunadonan di trabou ta experiencia falta di claridad. Ta tempo pa pone ordo.
“For di Parlamento di Aruba esaki tin mi atencion. E mocion cu mi a presenta riba 25 di augustus 2025, den cual a urgi gobierno pa pone ordo den e situacion existente y pa nombra sin tarda mas un supervisor, tabata un expresion cla di e deseo di Parlamento di Aruba pa yega na un sistema di supervision efectivo. Awor cu a pasa un tempo considerabel, ta momento pa haci un evaluacion y pidi gobierno splicacion,” asina Hart ta afirma.
Hopi asunto fundamental manera esaki no a haya nan atencion debido den e ultimo añanan di gobernacion, pero ta tempo pa pasonan concreto wordo tuma pa fortalece sostenibilidad financiero y proteccion social pa trahado di Aruba. Tambe Comision di Economische Zaken y Primaire Sector a sinta cu Insurance Association di Aruba (IAA) pa discuti e sistema di pensioen pa sector priva pa tin miho claridad riba e situacion actual. Gobierno di su parti a inicia dialogo social y a wordo anuncia cu SVB lo fungi como e toezichthouder y cu lo haci revision na e ley actual.
Na e momentonan aki tin miles y miles di empleado cu ta sigura bao di e Ley di Pensien General (LAP) cu a introduci na 2011. E ley aki a keda introduci den Gabinete Mike Eman I pa motibo cu hopi empleado den sector priva no tabatin derecho riba un pensioen banda di pensioen di behes (AOV). A introduci LAP pa sigura cu doño di trabao y empleado cera un seguro di pensioen pa e empleado. Gobierno di su banda a cuminsa cu dialogo hunto cu SVB, APFA, companianan di seguro y gremionan sindical y comercial pa evalua e ley.
Hart: “Supervision ta importante, caminda cu mester tin tambe mas comunicacion y conscientizacion, pa asina informa trahado y dunado di trabou riba su derecho y obligacion bou di e ley di pension. Como representante di pueblo mi tin e responsablidad pa controla gobierno su maneho. Den cuadro di esaki mi a dirigi diferente pregunta na minister president riba e tematica aki, pidiendo pa habri e debate tocante e sistema di pensioen general pa sector priva y legislacion cu ta proteha e derechonan.”