Durante e encuentro informativo organisa pa partido PPA, mr. Evelyn Wever-Croes, parlamentario pa fraccion di MEP, a comparti informacion clave y un analisis riba e consecuencianan cu e implementacion di HOFA lo tin pa Aruba. E parlamentario a indica cu e tipo di encuentronan aki ta netamente locual e gremio comercial tabata pidi: pa haya informacion for di tur angulo.
A pesar di e importancia di e topico, Wever-Croes a lamenta cu e fraccionnan di AVP y FUTURO no tabata presente. Sinembargo, el a califica e anochi como un exito rotundo debi na e participacion activo di e gremionan.
E miembronan di gremio comercial y e comerciantenan mes a haci hopi pregunta, y nos a duna hopi informacion. Al final di dia, esey ta locual ta importante: cu nos pueblo ta bon informa pa asina por forma nan propio opinion,” Wever-Croes a declara.
E peliger di perde autonomia financiero
Durante su presentacion den e encuentro e parlamentario a cuestiona seriamente e costo politico y social cu e ley aki lo trece cune. Wever-Croes a lansa un pregunta structural na e audiencia:
Con awor, cu Aruba ta financieramente bon para, nos ta bay pasa e palabra final di nos finansa den man di Hulanda? Acaso Hulanda por haci e trabou miho cu nos?”
E representante di MEP a recorda e presentenan cu Hulanda tin mas di diesseis aña caba ta maneha e finansanan di Corsou y Sint Maarten via organonan similar, y e resultadonan ey no ta mustra cu nan ta miho para cu Aruba. “Mi ta kere den Aruba, mi ta kere den e forsa di nos propio hendenan,” el a enfatisa.
Desmientiendo e argumentonan di Gobierno
Wever-Croes a uza su intervencion pa desmenti varios di e argumentonan cu Gobierno ta uza pa hustifica e necesidad di HOFA:
• Riba e Rating Financiero: Gobierno ta boga cu sin HOFA Aruba lo perde su rating financiero. Wever-Croes a aclara cu esaki no ta berdad, ya cu e bon rating cu Aruba tin aworaki ta basa riba e propio meritonan y e logronan cu e pais a alcansa e ultimo añanan.
• Riba Supervision: El a desmenti cu mester di e ley aki pa tin supervision financiero, recordando cu Aruba tin supervision caba desde aña 2015 y cu esaki ta funcionando debidamente.
• Riba Combate di Corupcion: E parlamentario a califica como un “mentira” e argumento cu HOFA lo yuda combati corupcion. “HOFA no tin nada di haber cu corupcion. Corupcion nos ta bringe aki na cas, na Aruba mes, atraves di nos mesun institutonan manera Ministerio Publico, Corte, Cuerpo Policial, Bureau Integriteit Aruba y Ombudsman. Nos mester sigui inverti den nos institutonan,” el a splica.
Un prijs hopi caro pa Aruba
E parlamentario a reconoce cu HOFA tin algun beneficio, indicando cu e por yuda Aruba spaar rond di 18 miyon florin pa aña. Sinembargo, el a adverti cu e prijs cu Aruba tin cu paga pa esaki ta demasiado caro.
E prijs ta cu e ultimo palabra riba nos finansa publico no lo wordo tuma mas na Aruba, ni pa Gobierno, ni pa Parlamento. Y aworaki cu nos tin un surplus financiero, atraves di un maneho unda a logra surplus tres aña tras di otro, nos ta demostra cu nos por maneha nos pais financieramente bon,” Wever-Croes a splica.
Pa conclui, el a haci un yamada pa no cambia bachi y duna e yabi di e maneho den man di Hulanda. El a subraya cu esaki ta e momento pa mantene firmedat na Aruba, pa asina hunto por logra e bienestar di henter e pueblo.
