Kuerpo Polisial Hulanda Karibense (KPCN) a otorgá diploma na 18 agente aspirante den presensia di nan famia, amigu i partner. E klas aki ta spesial, pasobra nan ta e promé grupo den kuerpo ku a kaba e estudio di MBO-4.
A inisiá e seremonia ku diskursonan di e kordinadó di studio di KPCN, sr. Rouel Pinedo i di e hefe di Departamentu Internashonal di Akademia di Polis, sr. Johan van Lare. Gezaghebber di Sint Eustatius, sra. Alida Francis, via un mensahe di vidio tambe a dirigí palabra na e studiantenan i gezaghebber interino di Boneiru, sra. Ingrid Sealy, a duna un kontribushon inspirativo.
Despues di esaki, Hefe di Kuerpo, sr. Alwyn Braaf, a dirigí palabra na e aspirantenan. Den su diskurso, el a pone énfasis riba e logro úniko di e grupo aki i e responsabilidat ku ta bin kuné. El a yam’é “un momentu históriko” pa KPCN i a sigui: “Boso ta pone un standart nobo awe. Boso ta e promé grupo den historia di KPCN ku ta kaba e estudio na nivel MBO-4, i for di awe boso ta karga e rango di brigadir.” Tambe el a enfatisá e importansia di profeshonalismo, kolaborashon i konfiansa den e kuerpo: “Komo kuerpo nos ta un famia. Riba kaya nos ta pará skouder ku skouder, i e konfiansa ei mester ta mutuo.”
Seguidamente den un forma seremonial, e momentu ofisial di firmamentu a tuma lugá, di kua Hefe di Kuerpo i sr. van Lare a kambia e epalètnan di e rango agente aspirante pa e rango di brigadir. A terminá e seremonia ku un diskurso di un representante di klas, kende a ekspresá e kaminda ku huntu nan a kana i e ambishon di e grupo. Despues di esaki, tur e invitadonan a finalisá e seremonia di un forma festivo.
KPCN ta felisitá tur esnan ku a gradua ku e logro eksepshonal aki i ta deseá nan un karera seif i éksitoso den kuerpo.