Asina ta e caso cu e meneer Hulandes na playa Porto Marie, kende ta cobra bo e cantidad di cen ey pa por realisa bo casamento na playa Hunto, e playa pega cu Playa Porto Marie. Segun informacionnan atkerí, e meneer ta na Porto Marie, y ta atende cu e tereno pega cu Porto Marie. Ta conoci cu e tereno pega cu Porto Marie akí ta un tereno priva, pero no e playa! E tereno tin un bum, cual ta cera cu candal, obstaculisando pasada pa subi esaki. Nada contra.
Sinembargo, cu e lama ta keda na Costa di e tereno, no ta haci bo doño di e playa en cuestion. Di e manera aki, habitantenan di nos isla cu ta desea di sea haci un fiesta of casamento na e playa menciona, a scucha via cu ta e meneer ta carga yabi di e bum, pues cu mester tuma contacto cu e meneer. Asina a bin bira conoci cu e shon ta cobra Nafl. 2000,- pa haci uzo di nos playa, riba nos tera, na nos pais!
Ta insolito sinta mira e tipo di inhusticia aki tuma luga! Unda na mundo bo por sali for di bo pais i bay cobra pa tera cu no ta pertenece na bo? Pues NO TA POSIBEL cu ningun hende, for di ningun parti di mundo ta bini i bin manda y restringi e yiu di tera pa haci uzo gratuitamente di su playanan! Si sigui trata e tipo di casonan aki cu man di felpa, nos ta para bira burla di hende.
Pues un suplica ta bay na nos Minister corespondiente, pa actua cu rapidez pa cu e situacion aki i pone un paro na e inhusticia cu ta tumando luga. Si ta asina’kí ta actua, anto ta miho Gobierno mes cera tur playa i cuminsa cobra anto. Paso asina sikiera nos sa cu e cen cu nos ta pagando ta bay den caha di Gobierno, i no den saco i fortuna di otro.
