Bonaire

Baki di kuminda di foam ta prohibí for di 1 di ougùstùs

Olb Sup Foam Pap

Pa proteha naturalesa di Boneiru i bo salud ta prohibí bakinan di kuminda di foam. E prohibishon di baki di kuminda di foam ta drenta na vigor dia 1 di ougùstùs 2022. E prohibishon akí ta konta pa tur hende na Boneiru ku ta bende òf duna baki di kuminda di foam ku ta usa un biaha so.

E prohibishon ta regardá solamente baki di kuminda trahá di e material foam. Ta trata di baki di kuminda pa bai kuné, pa tur sorto di kuminda i e sousnan korespondiente, ku bo por kome mesora, direktamente for di e baki i ku bo no tin mester di kushiná òf prepará mas aleu (manera hasa, herebé òf kenta). Pensa riba baki di kuminda pa bai kuné di foam ku òf sin tapa i kùp di foam pa por ehèmpel sòpi. 

Un ehèmpel di empake ku no ta kai bou di e prohibishon ta entre otro  empake pa produktonan di karni den e kulernan di supermarket. E prohibishon no ta konta tampoko pa baki di kuminda di otro material ku no ta foam. Pensa akí riba kùp trahá di plèstik tradishonal òf bioplèstik.

Entidat Públiko di Boneiru ta enkurashá tur hende pa hasi uso di artíkulonan reusabel ora esei ta posibel. Komo habitante i bishitante di e isla akí nos tur tin nos propio responsabilidat pa tene nos ambiente di biba i nos naturalesa limpi i saludabel. Bai por ehèmpel ku bo propio kosnan manera kuchara, fòrki i kuchú òf un propio beker òf tèrmo pa bebe. Negoshinan di hòreka i risòrtnan por pensa por ehèmpel riba keda sin duna richi desechabel pa bebe (ku no ta di plèstik), a ménos ku un wéspet pidi pa esaki.

Supervishon 

Direktorado di Supervishon i Mantenshon di Lei a bishitá diferente supermarket, negoshi di hòreka i ‘foodtruck’. E inspectornan a mira ku ya kaba hopi di e negoshinan akí ta tene nan mes na e prohibishon pa saku, kuchara, fòrki, kuchú, richi i kos pa drai bibida di plèstik. Ta hopi positivo ku nan ta kumpli bon ku e prohibishon. 

Nos ta haña importante ku empresanan ku ainda ta usa plèstik desechabel i despues di 1 di ougùstùs ainda ta usa empake di kuminda di foam, rápidamente tambe ta pasa over pa otro opshonnan. Na fin di luna di ougùstùs e supervisornan di Direktorado di Supervishon i Mantenshon di Lei ta bai kontrolá atrobe. 

Empresanan ku ta sigui usa plèstik desechabel, por risibí un atvertensia riba papel. Den kaso ku e empresa ketu bai ta sigui  hasi uso di plèstik desechabel i empake di kuminda di foam, e ora ei ta inisiá un trayekto formal di mantenshon di lei atministrativo. Esaki ta nifiká ku e empresa por haña un but. 

Lesa mas informashon tokante e prohibishon akí i e prohibishon di plèstik desechabel riba nos wèpsait www.bonairegov.com. Òf manda un email ku bo preguntanan na plasticvrij@bonairegov.com.

 

Related posts

Anochi ku luna yen 25 di mart 2024 na forma, kaya barakuda 33 ku tema ‘huntu na kaminda pa di kuater lustro anochi ku luna yen’

EA News Author

Arthur Sealy komo ihá na desvelo di Busto di Tavio St. Jago

EA News Author

Entidat Públiko Boneiru preparando pa bakunashon kontra corona

EA News Author

Leave a Comment

Whatsapp Message