Riba djadumingu promé di sèptèmber, alrededor di 6.30 or di atardi, Kuerpo Polisial Hulanda
Karibense (KPCN) den kolaborashon ku Duana Hulanda Karibense a tene un akshon riba Kaya Ir.
Randolph Statius van Eps (kaminda di Sorobon) en konekshon ku aktividatnan ilegal ku ta tuma lugá
riba e kaminda aki.
Polis a sera e kaya na ámbos banda i a kontrolá shofùrnan riba e dokumentonan konserní. Na mes
momentu, Duana, huntu ku dos kachó spesial, a tene kòntròl riba violashon di Lei di Opio -i Arma di
Kandela BES. Durante e kòntròl a para i kontrolá 92 vehíkulo, di kua 80 outo, 10 skuter i dos quad. A
skibi un total di 18 but. E butnan tabata 9 pa manehá sin reibeweis bálido i 9 pa manehá sin seguro
bálido òf pa no por mustra esaki.
A bai warda di polis ku kuater outo, un pikòp i un skuter. Esaki ta nifiká ku e doño por haña su
vehíkulo bèk despues ku e por mustra e dokumentonan konserní òf despues ku terminá ku e
investigashon. E kosto di tou e vehíkulo lo ta riba kuenta di e shofùr. Banda di esaki a konfiská
diferente saku chikitu ku supstansianan probablemente narkótiko (mariwana).
Kuerpo Polisial Hulanda Karibense ta hasi un yamada na un i tur pa no partisipá na e tipo di
aktividatnan ilegal. Polis lo sigui tene e tipo di akshonnan aki pa garantisá seguridat di tur
partisipantenan den tráfiko. Bo no ke pèrdè bo vehíkulo? No partisipá na e tipo di aktividatnan ilegal
aki.
Banda di esaki, KPCN ta hala atenshon di un i tur pa nan tin e dokumentunan nesesario, na òrdu.
Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta
kontribuí na un tráfiko seif i sigur riba e isla.
Bo no ta kumpli ku reglanan? Bo por haña un but. E suma di un but pa e violashonnan menshoná ta
varia entre $30 te ku $225.
