Miho konosí komo nulurencontract
Esei ta e mensahe kla ku frakshon MAN-PIN ta manda ku presentashon di e Lei di Inisiativa riba Limitashon di Kontrakto di Sero-Ora, den boka di pueblo “nulurencontract”.
Na Kòrsou tin mas ku 11.000 trahadó laborando riba un kontrakto laboral lòs òf temporal. Esaki ta alrededor di 16.8% di trahadónan, di kua demasiado hopi ta laborá regularmente, pero riba un asina yamá “nulurencontract.” E fenómeno aki a bula bin for di Hulanda, ku mirando e efektonan negativo ku kontraktonan asina tin pa e trahadó, ya ta eliminando kontratonan di sero-ora.
Ta opvio ku tipo di kontraktonan asina ta hinka trahadónan den un situashon hopi difísil: tur siman nan no sa kuantu ora nan lo traha, kuantu nan lo gana i ta biba den un inseguridat kontinuo pa ku nan entrada i kumplmentu ku nan obligashonnan di fin di luna pa ku nan famia. Sierto dunadónan di trabou ta hasiendo mas i mas uzo di kontratonan di sero-ora ku e intenshon di eskivá leinan laboral i leinan di seguro sosial. Trahadónan hopi bia no tin otro opshon ku “guli manda bou”, ya ku kualke protesta di nan banda por nifiká pèrdidá kompletu di trabou i entrada.
E lei nobo ku frakshon MAN-PIN a entregá ta pa evitá ku ta sigui maluzá trahadó. Ku e proposishon di lei di MAN-PIN:
Kontrakto di sero-ora lo por keda uzá solamente den kasonan spesífiko i pa un tempu limitá (enfermedat, embaraso òf pik di trabou èkstra pa no mas ku 3 luna).
Si dunadó di trabou abuzá di e situashon, e kontrato ta bira automátikamente un kontrakto di trabou pa un kantidat di ora fiho.
Esakinan ta duna e trahadó protekshon i stabilidat.
E trahadó trahando den situashon laboral di kontrato di sero-ora, ta pone e ku e trahadó ta keda stanká den su bida. E trahadó no por hasi fiansa pa p.e. kumpra un kas òf outo, bai ku vakashon, paso simplemente e no tin entrada fiho. Tur esakinan tin efekto i impakto sosial i emoshonal riba e trahadó.
E meta di MAN-PIN ta simpel: keda na lado di pueblo, no na lado di esun dunadónan di trabou ku ta saka bentaha di forma inhustu di trahadónan. Nos ta lucha pa e trahadó ku ta traha duru tur dia, pa nan tin siguransa di nan pan i biba un bida digno