Resientemente Boneiru a partisipá na e Silverjet Sales Run, un trayekto di benta i ret di e organisashon di biahe Silverjet, un spesialista den vakansi luhoso. Durante e ‘sales run’ akí ku a dura seis dia, Tourism Corporation Bonaire (TCB) a haña oportunidat pa pone nos isla bou di atenshon di no ménos ku 200 agente di biahe komo destinashon eksklusivo i di balor haltu.
Durante e ‘sales run’ akí Marjolein Oleana, Business Manager & Europe Liaison na TCB, a representá Boneiru. El a duna vários presentashon, bai den kòmbersashon ku un kantidat grandi di agente di biahe, kontestà nan preguntanan i duna hopi tep balioso tokante Boneiru.
Silverjet ta enfoká riba e segmento mas haltu di e sektor di biahe i ta bende prinsipalmente vakansi luhoso ku atenshon pa komodidat, kalidat i servisio. Pa e motibu akí Boneiru su partisipashon na e ‘sales run’ akí ta konektá perfektamente ku e posishonamentu deseá di nos isla komo destinashon di vakansi luhoso i distinto.
Durante e ‘sales run’ TCB a duna diferente presentashon inspirativo tokante Boneiru, kaminda no a destaká solamente státùs di nos isla komo destinashon eksepshonal di buseo, pero tambe e variashon amplio di aktividat ku bishitantenan por eksperensiá. Banda di esaki a duna atenshon na e desaroyonan kulinario fuerte i Boneiru su ròl di pionero riba tereno di sostenibilidat. Tambe e trankilidat, siguridat i outentisidat di nos isla a bini dilanti, e karakterístikanan ku ta hasi Boneiru asina úniko.
E Silverjet Sales Run a bai vários siudat na tantu Bélgika komo Hulanda. Na Bèlgika e seshonnan a tuma lugá na entre otro Brugge i Liège, miéntras ku na Hulanda nan a bishitá entre otro Voorburg, Amersfoort i Amstelveen. Esaki a sòru pa un plamamentu amplio riba e merkadonan di mas importante pa Boneiru.
Segun TCB, e tipo di ‘sales run’-nan akí ta di gran importansia stratégiko pa Boneiru. Nan ta brinda oportunidat pa pone nos isla direktamente bou di atenshon di agentenan di biahe spesialisá ku diariamente ta den kontakto ku un grupo di enfoke ku ta dispuesto pa invertí den kalidat i eksperensia. E enfoke riba vakansi di luho ta konektá kompletamente ku e rumbo ku Boneiru a diseñá pa futuro: ménos turismo di masa i mas bishitante di balor haltu ku ta skohe pa kalidat, sostenibilidat i un eksperensia úniko.
Ku su partisipashon na e Silverjet Sales Run, un biaha mas Boneiru ta pone un paso importante den fortifikashon di su posishon komo destinashon uniko, outentiko i ku focus riba naturalesa i kultura riba e merkado Oropeo.
Boneiru a presentá su mes durante e Silverjet Sales Run na Bélgika i Hulanda
