E proyekto piloto pa un prosedura aselerá pa pèrmit di trabou na Boneiru a risibí evaluashon positivo di tantu Bonaire Hotel and Tourism Association (BONHATA) komo di e empresanan partisipante den sektor turístiko. For di e inisio dia 1 di yüli 2023 a mira mehorashon signifikante den tempu di prosesamentu di petishon di pèrmit, loke a kontribuí na satisfakshon serka dunadónan di trabou, empleadonan i gobièrnu.
Boneiru konosé un merkado laboral pèrtá. Pa e motibu akí tin ora ta nesesario pa trese hende Boneiru pa traha. Den e kasonan akí un pèrmit di trabou ta un eksigensia di gobièrnu pa hasi e trabou. Pa tantu dunadó di trabou, empleado komo gobièrnu e prosedura akí tabata kousa hopi malkontentu debí na e término di prosesamentu. Pa e motibu akí entrante 1 di yüli 2023 a hasi palabrashon pa kuminsá ku un proyekto piloto, den kua entre otro BONHATA ta bini ku dunadónan di trabou pa hasi e proyekto piloto akí un éksito. Finalmente 12 empresa for di sektor di enseñansa, kuido i turismo ta partisipá na e proyekto piloto.
E metanan pa e proyekto piloto ta lo siguiente:
- Realisá un tempu di prosesamentu pa pèrmit ku ta konsiderabelmente mas kòrtiku
- Determiná pa medio di prueba si a entregá e petishonnan korektamente
- Desaroyá kriterio pa un aplikashon mas amplio den kaso di otorgamentu di pèrmit
Despues di tres luna, na luna di òktober a tuma lugá un evaluashon konhunto di e proyekto piloto, for di kua resultadonan positivo a bini dilanti. Den e promé lunanan di aña 2024 ta bai wak mas detayadamente kiko ta e mihó kontinuashon pa e inisiativa akí.
Promé ku inisio di e proyekto piloto e dunadónan di trabou representá pa Bonaire Business Federation (BFB) i Kámara di Komèrsio, huntu ku Servisio di Imigrashon i Naturalisashon (IND), Plenchi di Trabou i Asuntunan Sosial i Empleo (SZW), a eksplorá kon por mehorá e prosedura mas aleu. Banda di adaptashonnan riba tereno di maneho, separashon adelantá di esunnan ku ta hasi petishon ku bon intenshon for di otronan ku ta hasi petishon ku intenshon potensialmente malu, ta di gran importansia pa redusí e tempu di prosesamentu.
Empresanan i institutonan ku ta buskando partikularmente personal ku formashon mas haltu (entre otro sektor médiko i enseñansa) tin un profil di riesgo mas abou. Tambe miembresia di un asosiashon empresarial manera BONHATA ta un faktor ku ta redusí riesgo. Esaki ta konta tambe na momentu ku tin un sistema di sertifikashon aplikabel riba un ramo di empresa, manera por ehèmpel den sektor di buseo.
A palabrá ku e dunadónan di trabou partisipante ku ta entregá e petishonnan pa pèrmit di trabou den un forma kompleto. Si ainda falta dokumentu, no por realisá e término di prosesamentu kòrtiku. Esun ku ta entregá e petishon ta responsabel pa e dokumentashon ta korekto i e mes ta kontrolá esaki. Sigur den kaso di diploma esaki ta na vigor. Si ta deseá esaki, por pidi asistensia serka IND òf SZW.
E evaluashon positivo di e proyekto piloto ta enfatisá e esfuersonan konhunto di tur e partidonan enbolbí pa mehorá e prosedura di pèrmit di trabou na Boneiru i hasi esaki mas efisiente, den nan aspirashon pa yega na un merkado laboral mas efektivo na nos isla.