En conexion cu e fecha natalicio di nos libertador Betico Croes.
Dialuna mainta, den e siman di celebracion di Dia di Betico, Minister di Enseñansa y Deporte Endy Croes a bishita scol basico Cacique Macuarima na Santa Cruz. E mandatario a ricibi un caluroso bonbini door di cabesante di scol sra. Rachelle Croes – Caster, docente y alumnonan cu tabata hopi entusiasma para na entrada di e scol. Na su yegada, Minister Endy Croes a wordo sorprendi cu un bunita gesto na unda un alumno a entrega e mandatario un bunita ramo di flor. Sigui presentacion di e alumnonan cu a canta himno di e scol. Despues a dirigi e mandatario na e klasnan 5. Durante e mainta ameno, Minister Endy Croes a comparti informacion di e historia, bida, trabou y logronan di Betico Croes na e alumnonan. E meta di e bishita ta pa e alumnonan conoce un poco historia y importancia di e lucha cu Betico a hiba pa henter e pueblo di Aruba pa por a logra e Status Aparte. E alumnonan tabata scucha cu hopi atencion, tabatin hopi pregunta. Na final Minister Endy Croes a haci e alumnonan pregunta y remarcabel ta cu nan tabata conoce caba diferente faceta di e historia di nos Libertador.
Cabesante di e scol, sra. Croes – Caster a expresa di ta contento y cu ta un honor di tin bishita di Minister Endy Croes na e scol. E bishita ta “sluit aan” na e simannan di preparacion cu e scol tabatin en conexion cu fecha natalicio di nos Libertador, Gilberto François ‘Betico’ Croes. Dia di Betico, ta aparece tur aña den curiculo di e scol, como un parti hopi importante di educacion di e alumnonan. Minister Endy Croes ta gradici e cabesante di e scol sra. Rachelle Croes – Caster, tur docente y specialmente e alumnonan pe bunita recepcion y pa un mainta asina ameno. ‘Ban recorda y celebra Dia di Betico pe herencia bunita cu e la laga atras, nos Status Aparte’, e mandatario a finalisa.
