Vocero di Taxi central nan di Aruba Linda Orman ta duna di conoce cu grupo di taxistanan a entrega un bezwaar na LAR, tambe a entrega e lista di firmanan. Gobienro ta na altura di kico ta e pensamento di e taxistanan ta. Tambe a tuma un decision cu no ta sinta cu minister Ursel Arends mas debi cu na momento cu ta reuni y ta papia algo den reunion y den publico e mandatario ta cambia tur cos y ta papia otro cos cu no a palabra den e reunion.
Na 2022 Minister di transporte Ursel Arends a papia cu e grupo di taxistanan ya pidi un reunion pa papia riba e problema cu tin den e mundo di transporte e mandatario no a contesta, awe den 2024 di e di 4 biaha cu ta manda e mail e ora ta contesta y ta bin di un manera di impone unda cu no ta sinta e dialoga y scucha taxistanan pero a bin impone un maneho.
Minister Ursel Arends a bin cu maneho nobo ni control no tin. E departamento nan di transporte publico un desaster , esaki ta pa motibo cu minister no sa kico pa haci y solamente kier duna mas permiso sin tin un maneho. Segun Linda Orman loke cu a ser bisa den e MB e minister no a cumpli cu esaki tampoco.
E grupo di taxistanan ta pendiente y ta mira riba e rumornan cu tin cu tin un cantidad di permisonan ta bay sali, esaki ta e mes un modus operandi cu ex minister Chris Romero a haci di saca permisonan un dia prome cu eleccion, minister Ursel Arends ta haciendo mes un cos, no tin un diferencia. Pa straño cu e ta zona ta e mes un director di DTP ta haciendo e trabounan pa Minister Ursel Arends scondi scondi manera cos cu yun hende no sa cu cosnan di iregularidad ta pasando.
E mandatario saca un permiso esey ta mustra di ta un mandatario cu no ta integro. Tur loke e mandatario a papia cu e luz di faro mester ta riba dje “BO ta nada, BO ta pio “ , asina Linda Orman vocero di grupo di taxistanan ta indica.
Na mes momento ta kere y ta indica cu mester bin un investigacion den departamento di DTP mirando cu e director di DIP a laga hopi cos bay fout y un hende mester para responsabel pa e actonan aki cu a cana robes.
Ta laga taxinan uza busnan grandi, esnan cu mester ta busnan grandi a uza busnan personal , esaki ta e consecuencia na momento cu tin un hende na cabes di un departamento cu e no sa kico e mester haci ta conduci cu ta haya un maneho con cu ta, esaki ta loke minister Ursel Arends ta para pe.
E director di DTP no tin un idea kico ta e diferencia di un landsbesluit y un landsverordering , cosnan ta cana malo y pa straño cu e ta zona minister di transporte Ursel Arends no ta atende cu e director riba e foutnan cu ta keda haci y cu aki ta lanta e sospecho cu tin algo cu ta cushina y cu ta sconde bou di bariga di otro.
Vocero di taxistanan ta indica cu e ta durf di bisa cu minister Ursel Arends ta “doe mee” cu e director , algo mester ta pasando cu tin tanto proteccion entre e director di DTP cu ta haci un mal trabou y e minister di transporte den e caso aki cu ta Ursel Arends.
Minister Ursel Arends den un conferencia di prensa a show cu papel den conferencia di prensa unda cu ta gaña gruponan di taxista kier sa unda e documentonan ta y unda e keho ta y unda e pruebanan ta cu no a yega ministerio publico ainda.
Minister Ursel Arends no ta integro , e ta papia un cos cu e grupo di taxistanan y e ta papia otro cos den media unda cu ta pone e comunidad di Aruba pensa cosnan cu no ta corecto. Esaki ta e punto dicon gruponan di taxista no lo sinta mas cu ne, debi cu na momento cu papia un palabra den e meeting ta para tras di loke ta papia y no ta cambia version y papia cosnan den media cu no a papia mes den e reunion, esaki ta claramente cu minister Ursel Arends tin dos cara.
E gruponan di taxista tin e speransa cu un dia e situacion por drecha , pero principalmente pa nan por haya un “rechtbescherming “ pa stop di mete cu e derechonan di e taxistanan. Minister di transporte Ursel Arends a mete cu derecho di e taxistanan cu ta hancra den un landsverordering y landsbesluit y e mandatario kier dicta cu un MB.
Taxistanan mester por haya un sistema cu nan derechonan ta protegi y cu ningun minister cualkier sea nan color politico no por mete cu e transporte publico tanten ta cumpli cu ley y reglanan.