Recientemente, diputado Timoteo Silberie y un consehero di maneho di Directorado di Comunidad y Cuido di Entidad Publico Boneiro, a participa na e Family Justice Center Capitol Hill Days & Leadership Summit na Washington D.C. Durante e encuentro internacional aki, a intercambia conocemento tocante e maneho di violencia domestico, maltrato di mucha, maltrato di hende grandi y otro formanan di violencia den famia.
E conocemento adkiri durante e encuentro aki ta cuadra bon cu e proceso pa sigui traha pa funda un Family Justice Center (FJC) na Boneiro. Diamars 9 di juni 2026, tabatin un encuentro pa huntu cu e partnernan di cadena cuminsa traha riba con pa duna FJC forma den futuro.
Tabatin representante di KPCN, Guiami, Akseso, Zorg- en Veiligheidshuis, Krusada, Tabitha, Reclassering, Mental Health Caribbean (MHC) y Voogdijraad.
Durante e reunion a papia tocante:
maneho conhunto di violencia domestico, maltrato di mucha y maltrato di hende grandi;
colaboracion entre diferente organisacion;
preparacion di un acuerdo di colaboracion;
tur servicio y sosten cu e partnernan por ofrece for di FJC.
Family Justice Center lo bira un lugar seguro y accesibel caminda habitante por bai pa haya yudansa, proteccion y guia. Reuniendo diferente organisacion na e mesun localidad, victima y famia lo por ricibi yudansa cu ta miho y mas lihe.
“Nos no ta trahando solamente riba un edificio, sino principalmente riba un relacion di colaboracion duradero caminda duna yudansa, cuido y siguridad ta fortalese otro. Finalisacion di Family Justice Center ta acercando. Den e periodo cu ta bini, nos lo informa comunidad activamente tocante tur loke e centro ta brinda y tocante e importancia di señalamento na tempo y sosten den caso di violencia domestico y otro formanan di abuso,” asina diputado Timoteo Silberie a declara.
