Representantenan di Boneiru ta partisipando aktualmente na e di 40 edishon di Seatrade Cruise Global ku ta tumando lugá for di 7 te 10 di aprel na Miami Beach, Florida.
Meskos ku e añanan anterior, Boneiru orguyosamente ta kompartí un stènt ku su islanan ruman, Aruba i Kòrsou. E kolaborashon regional aki ta presentá un oportunidat balioso pa enbolbí ku ‘key players’ den e industrianan marítimo i krusero, papia tokante inisiativanan aktual, i eksplorá strategianan pa futuro miéntras ta mustra e ofertanan úniko di Boneiru na un públiko mundial.
Representando Boneiru na Seatrade 2025 ta Elesiër Angel, direktor statutario interino di Tourism Corporation Bonaire (TCB), Günther Flanegin, kapitan di haf, i Marlon Richardson, direktor di direktorado di Supervishon i Mantenshon di Lei.
Selebrando su di 40 edishon e aña aki, Seatrade Cruise Global ta sigui ta e plataforma prinsipal pa profeshonalnan di krusero rònt mundu. E ‘Seatrade Cruise Portfolio’ ta inkluí eksposishonnan mundial renombrá, konferensianan, eventonan di ret, premionan, i un variedat di plataformanan di media ku ta kubri tur faseta di e industrianan krusero i marítimo.
