Featured General Aruba Turismo

Di acuerdo cu aruba tourism authority: turismo ta sigui progresa gradualmente


ORANJESTAD, Aruba

Como e autoridad di turismo di Aruba y en conexion cu e re-apertura di nos frontera, A.T.A. conhuntamente cu diferente organisacionnan turistico ta desea pa informa nos comunidad di e situacion actual pa loke ta trata e industria turistico y loke por spera pa luna di augustus 2020, conforme informacion compila na e momentonan aki cu ta mediante augustus unda cu Aruba ta conta cu un subida den cantidad di casonan di COVID-19 activo.

TRAFICO AEREO:

Debi na e ultimo desaroyonan pa loke ta trata e pandemia na Aruba mes, a wordo anuncia cu nos destinacion ta wordo mira como code oranje pa Hulanda y relata cu esey tin ahustacionnan den e vuelonan.

Conforme AAA (Aruba Airport Authority) tin un total di 6 vuelo di Hulanda pa Aruba cu e aerolinea TUI pa nos isla durante luna di augustus, cual ta inclui un vuelo di repatriacion cu a sali e siman aki caba. E otro vuelonan pa Aruba cu e aerolinea aki a wordo cancela. Aerolinea KLM a mantene su vuelonan pa nos isla y hasta a añadi vuelonan adicional riba tur diabierna durante luna di augustus.

For di Merca, e aerolineanan Delta y JetBlue hunto a cancela 7 vuelo pa nos isla. Sinembargo, no ta conoci si esaki ta debi na e ultimo desaroyo pa cu e casonan di COVID-19 na Aruba of simplemente pasobra nan ta sigui consolida e vuelonan – cual a pasa caba durante luna di juli ultimo.

E aerolineanan regional Aruba Airlines, DiviDivi y EZ Fly a cancela tur vuelo pa nos isla te cu proximo aviso como cu Corsou a cera frontera pa vuelonan pa y for di Aruba.

ACOMODACIONNAN:

Aproximadamente 30% di nos bishitantenan ta keda den acomodacionnan alternativo. Segun AHATA (Aruba Hotel and Tourism Association) 60% di hotelnan cu ta miembro a experiencia cancelacionnan adicional ultimo dianan. E pronostico prome cu e cancelacionnan tawata un ocupacion average di 14% pa luna di augustus. Lo keda monitorea esaki. Na luna di juli grado di ocupacion reporta pa AHATA a baha, di otro banda e prijs average pa camber esta e ADR a keda stabil (mesun prijs cu juli 2019).

ATSA (Aruba Time Share Association) a menciona cu ta spera un ocupacion di 37% pa luna di augustus. Relata na e acontecimientonan actual na nos isla, ta dificil pa bisa con esaki lo impacta turismo. Un grado di cancelacion di 5% a wordo raporta.

PERSPECTIVA PA AUGUSTUS 2020:

Pa loke ta trata e pasaheronan, e siman aki Aruba ta spera un aumento di 150 pasaheronan adicional, compara cu siman pasa. E total pa e siman aki ta ekivalente na 5.753 pasahero.

Naturalmente A.T.A. continuamente ta sigui monitorea e feedback y ‘sentiment’ di e bishitantenan pa cu nos destinacion. Pa loke ta servicio cu ta brinda na cliente, e aumento local na nos isla pa cu e casonan relata cu COVID-19 no ta refleha como e topico primordial di preocupacion of feedback, pero mas bien e topico principal ta e necesidad di asistencia pa biaha pa Aruba. Entre esaki ta e asistencia pa yena e carchi ED (Carchi di Immigracion) y asistencia pa cu e test di COVID-19 prome cu e bishitante yega nos destinacion. Relata cu esaki, mester nota cu e siman aki A.T.A. a lansa un plataforma adicional riba su pagina web di aruba.com unda e bishitante ta haya informacion adicional pa cu e rekisitonan di test prome cu nan yega Aruba. E pagina aki ta inclui un tool cu ta busca informacion pa e usuario relata na su area geografico. E ta brinda e usuario opcionnan di unda e por yega na e test rekeri. Pa mas informacion por bay riba e pagina aki:  https://www.aruba.com/us/traveler-health-requirements/covid-testing

Mescos cu otro destionacionnan, nos isla ta pasando den momentonan di reto pa loke ta trata e pandemia aki. Ta importante pa nos tur sigui e protocolnan manera stipula door di diferente instancianan. Hunto nos lo vence y nos isla y su turismo lo sigui florece.

-FIN-

Related posts

Tin un ministeriele Beschikking y nos tur mester respeta esaki

EA News Author

Servico pa peticion di certificado di salud ex “green card” ta continua.

EA News Author

Recordatorio pa entrega Proposicionnan pa condecoracion real 2021

EA News Author

Leave a Comment