Diadomingo madruga pa mas o menos 12:15 dos persona ta presenta na warda di polis San Nicolas cu herida di bala y dos na eerste hulp na hospital.
Esnan cu a presenta na warda di polis San Nicolas ta conta cu un rato prome aparentemente un nissan march lo mester a pasa dilanti American Bar na San Nicolas y los tiro riba un grupo di persona para pafo . Nan ta sigui conta cu nan ta total 4 persona cu lo mester a haya herida di bala.
E dos nan cu a presenta na warda di polis a bay INSAM pa tratamento medico y despues por a bay cas.
E otro dos personanan cu a presenta na eerste hulp na hospital cu herida di bala a wordo atendi di biaha y nan si a keda interna. Nan situacion ta stabil.
Patruya a bay na e sitio di e sucedido y recherche a presenta pa asina haci nan investigacion. Slachtofferhulp tambe a presenta.
Cuerpo policial ta pidi encarecidamente na es cu sa algo of a wak pa yama e tiplijn di polis cu ta 11141.
Dos persona ta presenta na warda di polis cu herida di bala
