Cu e apertura di scolnan aña escolar nobo, Departamento di Salubridad Publica (DVG) a duna inicio na su campaña anual di vacunacion escolar. Jeugdarts JGZ Jan Hubert ta splica cu e meta principal ta pa drenta scolnan y vacuna un cierto grupo di mucha contra malesanan infeccioso, garantisando cu e muchanan por crece den bon salud y proteha comunidad completo.
De 1971 pa awor, e programa aki a duna resultado positivo, protehando generacion tras generacion contra malesanan cu por wordo preveni. E vacunacion no solamente ta proteha e mucha individual, pero e ta fungi tambe como un escudo pa henter e comunidad keda liber di malesanan infeccioso.
Importancia di vacunacion y refuerso
E proceso di vacunacion ta cuminsa for di ora un mucha ta baby, cuminsando na Wit Gele Kruis y sigui despues na scol. Sinembargo, proteccion di algun vacuna ta disminui cu tempo, cual ta e motibo pakico refuerso ta necesario.
Entre e vacunanan cu ta wordo administra y cu tin mester di refuerso despues di cierto aña ta inclui:
• Difteria, Kinkhoest, Tetano y Polio: Vacunanan cu ta wordo ripiti pa fortalece e inmunidad contra malesanan grave.
• Sarampi, Cacheton y Rubela: Malenan viral pa cual e vacunacion inicial ta duna proteccion ora mucha ta chikito, y cu ta wordo reforsa na scol pa evita chens di contagio.
• HPV (Human Papillomavirus): Un virus comun cu por causa diferente forma di cancer, incluyendo cancer di boca di matriz (cervical cancer) na hende muhe y otro forma di cancer na hende homber. E vacunacion aki ta inicia for di klas 6 di scol basico pa muhe y homber.
Procedimento y permiso pa mayornan
DVG ta sigui un procedimento estricto:
Carta informativo y foyeto: Mayornan ta ricibi un carta specificando ki tipo di vacuna ta trata, acompaña pa un foyeto informativo.
Permiso firma: Mayor mester duna permiso y firma e carta pa indica si ta duna consentimento pa vacuna nan yiu.
Bishita na scol: Cuminsando di 4 di september, e team di DVG ta cuminsa pasa na scolnan pa eherce e vacunacion.
Jeugdarts Jan Hubert ta enfatisa e balor di e campaña aki pa mantene Aruba liber di malesanan infeccioso y ta invita tur mayor pa probecha e oportunidad aki pa percura pa e salud di nan yiunan. Si mayornan tin pregunta, DVG t’ey disponibel pa duna splicacion mas amplio cu ta posibel.
