Recientemente, e declaracionnan di Minister Gerlien Croes riba rednan social, caminda e ta cuestiona e negosacionnan rond di e Rijkswet y e 10% cu falta pa wordo acorda cu AVP –FUTURO no a sa di negosha un Bestuurlijk Akkoord no bindend prome cu e bira un Rijkswet., a lanta un polemica grandi den e esfera politico local. Ta recorda e mandatario cu e supervision financiero cu Aruba ta biba aden awe, tin su raiznan den e mesun partido cu e ta sinta cu ne awe cu ta forma AVP-FUTURO.
Un mirada bek na 2015: E nacemento di supervision
E discusion actual rond di e Rijkswet Aruba Financieel Toezicht (RAft) no por wordo separa for di e historia cronologico di finanzas publico di nos isla. Ta importante pa subraya cu e Ley di Supervision Financiero (LAft) a keda introduci na mei 2015, sigui pa e instalacion di e College Aruba financieel toezicht (CAft) na augustus di e mesun aña.
E decisionnan aki a wordo tuma durante e gobernacion di e partido AVP, e mesun constelacion politico den cual Minister Gerlien Croes ta forma parti awe. Analistanan ta señala cu e supervision aki tabata e consecuencia directo di e maneho di debe cu a wordo hiba den e periodo ey,(Gastamento di placa ) loke a obliga Hulanda pa interveni pa garantisa un miho control riba e placa di pueblo.
Incongruencia den e discurso politico
E critica principal contra e mandatario ta basa riba loke hopi ta considera un “falta di memoria historico” of simplemente un intento pa desvia atencion for di e realidadnan financiero. Segun e criticonan:
Responsabilidad Comparti: Cuestiona e falta di un acuerdo riba e ultimo 10% di e Rijkswet ta wordo mira como un movecion “entrega”, specialmente ora e mesun partido cu a hinca Aruba den e posicion di debe aki ta esun cu awor ta pidi pa mas control externo.
Peril di “Mustra Bobo”: Den e circulo periodistico y politico, ta wordo menciona cu como minister y hurista, Croes mester tin un entendimento mas profundo di e implicacionnan legal y e origen di e crisis. “Miho keda keto y no mustra bobo,” tabata e sentimento di algun opositor cu ta haya cu e mandatario no ta midiendo e peso di su palabranan ora di papia di “fiesta cu placa di pueblo.”
Desafionan den e negosacionnan
Mientras e mandatario ta argumenta cu Aruba mester e supervision aki pa evita malgastamento den futuro y pa no wordo exclui di ayudo financiero den caso di un pandemia nobo, e posicion aki ta keda debati formalmente. E punto di discordia ta keda e soberania di Aruba versus e condicionnan structural cu Hulanda ta impone pa refinancia e debedonan cu a wordo acumula netamente den e añanan cu supervision a wordo introduci.
Pa hopi, e posicion di Minister Gerlien Croes ta falta di etica politico, considerando cu e ta sinta den un gobierno cu a conduci Aruba na e mesun supervision financiero cu awe e ta defende como un “necesidad.” E debate riba e Rijkswet ta keda un tema sensitivo cu lo sigui domina.