Fraccion di PPA a reafirma su invitacion na tur lider di fraccion pa participa den e anochi informativo tocante HOFA y LWHO cu lo tuma lugar diamars 16 di juni na SIMAR. Segun parlamentario Eduard Pieters, e iniciativa aki no tabata ni ta un debate politico, sino un esfuerso pa duna informacion directo na pueblo di Aruba riba un tema cu lo tin impacto den futuro di nos pais y pa tur hende. “Nos meta principal ta simpel,” Pieters a declara. “Pueblo ta pidi informacion y nos como parlamentario tin obligacion pa informa.”
No ta un debate sino un encuentro informativo
Segun Pieters, e formato di e actividad ta diseña specificamente pa evita confrontacion politico. E idea ta pa tur lider di fraccion participa como panelista, compartiendo informacion y contestando e preguntanan di comunidad y di e sector comercial.
“Nos no ta busca debate. Debate ta den Parlamento. Aki nos kier duna y haya informacion,” Pieters a enfatisa. E parlamentario a lamenta cu algun lider politico a interpreta e invitacion como si tabata un debate politico, mientras cu e convocatoria original ta enfoca riba orientacion y haya claracion riba e topico.
Un invitacion cu ta sigui habri
Pieters a confirma cu e invitacion ta habri pa tur lider di fraccion cu kier participa.
“Te ainda, e invitacion ta riba mesa. Nos ta sigur cu tur lider politico ta compronde e balor di informa pueblo,” el a expresa. Segun Pieters, no tin nada negativo den crea un espacio, unda e ciudadanonan por haci pregunta y haya informacion directo for di representantenan den Parlamento.
Informacion nunca ta enemigo di democracia
Un di e mensahenan central di Pieters ta cu un pueblo bon informa ta fundamental pa un democracia saludabel. “Informacion nunca por daña un pueblo,” Pieters a declara. “Hamas informacion por causa daño na un comunidad. Mas informacion un pueblo tin, mas fuerte nos democracia lo bira.”
Incluso pa garantisa imparcialidad, PPA a busca un moderador independiente y profesional pa guia e encuentro. Despues cu circunstancianan personal a impedi e moderador inicialmente escogi participa, Drs. Jose Fernandes a acepta e responsabilidad di conduci e actividad.
Un yamada pa unifica y no pa dividi
Pieters a conclui cu Aruba ta enfrentando e decisionnan importante tocante su futuro institucional y financiero. P’esey, segun e, e momento pa comparti informacion y fortalece dialogo ta awor. “Nos ta sigui lucha pa unidad. Nos ta sigui boga pa informacion corecto y transparente. Ora ta trata di e topiconan fundamental di nos Constitucion y futuro di pais, nos mester pone interes general prome cu interes politico partidista.”
“Pueblo merece informacion. Y e invitacion ta sigui habri pa tur lider di fraccion cu kier contribui na e dialogo.”