Entidat Públiko Boneiru ta yama bon biní na e konseho resien di e Hunta pa Ambiente di Biba i Infrastruktura (Raad voor de leefomgeving en infrastructuur – Rli), ku ta pidi atenshon pa e ambiente di biba físiko na Boneiru, Sint Eustatius i Saba. Den e konseho ‘Samen naar beter – Huntu pa mihó’ nan ta suprayá ku kolaborashon struktural i invershon dirigí ta nesesario pa inkluí nos islanan na un manera ekivalente den maneho di Reino pa ambiente di biba. Diputado Anjelica Cicilia a risibí e konseho na nòmber di entidat públiko Boneiru.
Kompartí ambishon i responsabilidat
Boneiru ta enfrentá retonan grandi riba tereno di konstrukshon di bibienda, infrastruktura i ordenamentu teritorial. Tin oportunidatnan evidente pa mehorá kalidat di bida na nos isla na un manera duradero. Pa logra esaki ta esensial ku Reino i e islanan karibense konhuntamente ta formulá ambishonnan klarito i tradusí esakinan den plannan konkreto i sosten struktural. Solamente asina konhuntamente nos por edifiká un ambiente di biba ku ta realístiko i hustu pa tur habitante di Hulanda.
Mehorashon struktural ta rekerí un aserkamentu konhunto
Ku rason e konseho di e Hunta pa Ambiente di Biba i Infrastruktura ta menshoná ku falta di finansiamentu struktural i insufisiente konekshon a base di maneho na e parti oropeo di Hulanda ta forma un opstákulo. Ehekushon di proyektonan importante ta rekerí sufisiente kapasidat, un repartishon di tarea klarito i enbolbimentu atministrativo di ámbos banda.
Boneiru ta mira den e konseho akí un oportunidat importante pa fortifiká e kolaborashon ku Reino i pa sigui edifiká riba programanan eksistente. Un ampliashon di e Programa Nashonal pa Regionnan Vital (Nationaal Programma Vitale Regio’s) pa Hulanda Karibense lo ta un paso lógiko i balioso.
Enbolbimentu tempran ta esensial
Entidat Públiko Boneiru ta djòin e yamada di e Hunta pa Ambiente di Biba i Infrastruktura pa inkluí Hulanda Karibense for di inisio den trahamentu di maneho. Esaki ta rekerí un sistema di traha struktural, kaminda ta enbolbí e islanan ku areglonan, legislashon i programanan di desaroyo nashonal. Boneiru ta dispuesto pa kontribuí aktivamente na esaki i ta buskando un posishon ekivalente den desaroyo di maneho, den sinkronisashon estrecho ku habitantenan i empresarionan na nos isla.
Huntu na kaminda pa un ambiente di biba di kalidat igual
Entidat Públiko Boneiru ta spera un kolaborashon mas intensivo ku Reino, basá riba konfiansa mutuo, metanan kompartí i planifikashon riba término largu. Entidat Públiko Boneiru ta hasi un yamada riba gabinete hulandes pa no djis tuma nota di e rekomendashonnan di e Hunta pa Ambiente di Biba i Infrastruktura, pero pa realmente tradusí esakinan den maneho i akshon. Ekivalensia no ta un kestion di kopiamentu di maneho, pero di trabou na midí i ‘partnership’. E konseho akí ta ofresé un bon punto di salida pa esaki.