Awe mainta, durante ceremonia na Scol di Arte na San Nicolas, participantenan di e di 20 grupo di Formacion Social, SVT-20, a ricibi nan certificado, marcando un momento importante despues di un trayecto caracterisa pa disciplina, perseverancia y preparacion pa nan futuro.
Prome Minister Mike Eman, conhuntamente cu Minister di Salubridad, Asunto Social, Cuido di Adulto Mayor y Maneho di Adiccion Mervin Wyatt-Ras, parlamentario Jennifer Arends-Reyes y demas invitado, tabata presente pa acompaña e hobennan durante e momento special aki, hunto cu famianan, amigonan, representantenan di Marinierskazerne Savaneta y esnan cu a guia nan durante e programa.
Durante su palabra, Prome Minister Eman a expresa su satisfaccion y orguyo pa e hobennan cu a completa e trayecto. El a destaca cu cada participante a yega na un momento den su bida caminda nan a haci un decision importante: pone nan mes dilanti, acepta un reto y persevera pa crea mas oportunidad pa nan mes.
Segun e Prome Minister, Formacion Social tin precisamente e balor di brinda un oportunidad adicional na hobennan cu ta den un fase crucial di nan desaroyo y ainda ta buscando direccion pa nan futuro profesional y personal.
Eman a reconoce tambe e papel importante di mayornan, famia y amigonan cu a sostene e participantenan durante nan trayectoria, como tambe e guia y disciplina brinda door di e profesionalnan y facilitadornan relaciona cu Formacion Social y Marinierskazerne Savaneta.
Un agradecimento special a bay na Marina pa su cooperacion continuo cu e programa. Eman a enfatisa cu e sosten di Marinierskazerne ta un elemento importante den e formacion y guia cu e hobennan ta ricibi.
E ceremonia di awe tin tambe un significado particular mirando cu Formacion Social a inicia na Aruba na 2010, durante e prome periodo di Mike Eman como Prome Minister, den cooperacion cu Ministerio di Defensa Hulandes. Cu SVT-20, e programa ta sigui brinda hobennan un oportunidad pa traha riba disciplina, responsabilidad, desaroyo personal y preparacion.
Prome Minister Eman a reafirma e sosten di Gobierno pa continuidad di Formacion Social, reconociendo e impacto cu e programa por tin precisamente na un momento caminda un hoben ta determina e siguiente paso den su bida.
E entrega di certificado ta corona e sacrificio y empeño di e participantenan, pero na mes momento ta representa cuminsamento di un siguiente etapa. Cu e experiencia y instrumentonan cu nan a haya durante SVT-20, nan ta sigui dilanti cu un base mas fuerte pa determina nan propio futuro.
“Nos ta orguyoso di boso. Pabien y sigui cu e mesun animo y motivacion,” tabata e mensahe di Prome Minister Eman na e hobennan.
