E aña aki Fundacion Respeta Mi ta introduci un tema nobo pa e campana di conscientisacion. E topico ta abuso fisico pero tambe cu e alternativanan. No kier keda focus solamente di kico ta e abuso pero tambe kier trece e alternativanan di kico ta abuso fisico y con pa preveni esaki.
Fundacion Respeta Mi ta trahando henter aña caba pa keda conscientisa comunidad pero principalmente nos muchanan tocante tur tipo di abuso. Maske cu e tema ta abuso fisico e aña aki Fundacion Respeta Mi ta traha riba tur tema y ta bishitando diferente scolnan desde cu aña a habri.
Den e bishitanan na scol por bisa cu ta alcansa mas di 600 mucha na Aruba cu e informacionnan. Tambe Fundacion Respeta Mi ta traha cu boluntarionan cu a train aña pasa cu e fundacion y e aña aki ta cana cu Fundacion Respeta Mi na tur e scolnan y ta dunando e presentacionnan nan mes cu e speransa cu den futuro nan lo carga e proyecto sigui cana cu ne pa futuro di nos generacionnan.
Luna di april ta luna di prevencion di abuso di mucha y den conexion cu esaki ta haciendo diferente actividadnan y lo para keto riba con lo por preveni, kico ta e abuso, pero na mes momento re educa nos mes pa sigui cu e causa di prevencion di abuso di mucha.
Ya caba tin dos aña cu ta cende luz na bestuurskantoor y e aña aki no ta diferente, esaki lo tuma luga e aña aki dia 12 di April.Trahado Social Preventivo Fundacion Respeta Mi Shennelyn Croes ta duna di conoce cu esaki tabata un iniciativa di dos stagere cu e cuminsa cu e proyecto aki y Fundacion Respeta Mi lo sigui honra esaki tambe.