Ku orguyo GGD Boneiru ta wak bèk riba un eksitoso seminar di dos dia tokante salú seksual. Durante e dianan akí profeshonalnan for di Boneiru, Saba i Sint-Eustatius a bini huntu pa presentashonnan inspirativo i tayernan interaktivo.
Ta importante pa hende ta salú i salú seksual tambe ta forma parti di esaki. Ta trata di un manera positivo i respetuoso pa anda ku seksualidat. Bon informashon pa tur edat ta yuda hende pa hasi eskoho na un manera salú i konsiente.
E promé dia tabata den signo di Mi futuro, mi eskoho konsiente (Embarasá awor akí nò). E programa akí ta sostené klientenan i ta kapasitá profeshonalnan pa papia abiertamente tokante un deseo pa haña yu, i tokante seksualidat i antikonsepshon. Durante e seminar nan a konta kon e programa a kuminsá na Boneiru i kua ta e promé resultadonan. Entre tantu 60 profeshonal a haña kapasitashon i a nombra 18 funshonario dediká na e tema. For di e komienso dia 2 di yüni, ya kaba nan a tene 28 kòmbersashon tokante un deseo pa haña yu.
Relashon i seksualidat tabata sentral riba e di dos dia. Diferente profeshonal di Boneiru a presentá nan trabou i a kompartí nan eksperensianan. Koleganan for di Saba i Sint-Eustatius a konta tokante nan trabou i tokante kiko nan a siña. Esaki a sòru pa interkambio i inspirashon balioso. Banda di esaki hóbennan a bini na palabra den un podcast ku a keda grabá na e sitio ei mes.
Mas aleu GGD Boneiru a presentá e último desaroyonan riba tereno di formashon relashonal i seksual. Pa basta tempu kaba GGD ta duna informashon seksual na hóbennan. Awor akí GGD ta ofresé guia i kapasitashon pa skol i organisashon di hóben tambe. E meta ta pa duna mihó sosten na nos hóbennan den nan desaroyo. Entretantu ya kaba a kapasitá 82 profeshonal den formashon relashonal i seksual.
Finalmente nan a duna splikashon tokante e ora di konsulta pa salú seksual di GGD Boneiru. Habitantenan por akudí akinan pa pregunta i konseho tokante seksualidat, deseo pa haña yu, antikonsepshon i malesa transmití seksualmente (soa). Ta posibel tambe pa hasi un tèst grátis di soa. E enfermera(o)nan ta traha segun sita i nan ta alkansabel for di djaluna te ku djabièrnè entre 08:00 or i 17:00 or.
Pa mas informashon òf pa traha un sita pa e konsulta pa salú seksual, habitantenan por yama òf manda un mensahe di Whatsapp na +599 790 7373.
Press release: Gobièrnu di Boneiru
