Durante conferencia di prensa diamars mainta, Minister di Husticia, Integracion, Transporte Publico y Energia, mr. drs. Arthur Dowers, a comparti varios actualisacion relaciona cu DIMAS y maneho di e programa Hunto pa Progreso.
Despues cu Hunto pa Progreso a conclui na december di 2025, DIMAS a sigui procesa tur peticion pendiente y monitor e resultado di e programa. E ultimo fase di Hunto pa Progreso a brinda alrededor di 1.500 persona un permiso temporal cu duracion maximo di un aña, cu e obhetivo pa brinda nan un oportunidad real pa integra den e mercado laboral formal, haya un dunado di trabao y sigui e trayecto regular di permiso.
Minister Dowers a indica cu hopi participante a haci bon uzo di fase 4 di Hunto pa Progreso pa regularisa nan situacion y contribui legalmente na nos economia. Sinembargo, a constata cu tin un grupo cu no a cumpli cu e responsabilidadnan cu tabata mara na e permiso temporal aki.
Gobierno a crea un oportunidad unico. E expectativa tabata cu e persona cu a ricibi e permiso lo busca pa integra formalmente den nos mercado laboral y na momento cu constata cu nan no ta cumpli cu e condicionnan estableci, lo tin consecuencia.
E mandatario a recorda cu e permiso temporal nunca tabata duna como un solucion permanente, sino como un transicion pa yega na regularisacion completo. Esnan cu no haya un dunado di trabao durante e periodo permiti no lo cualifica pa sigui den e trayecto y no lo bin na remarca pa permiso den futuro.
Durante e conferencia, Minister Dowers tambe a expresa su preocupacion riba varios caso unda personanan ta solicita permiso pa un funcion specifico, pero despues ta haci un trabao completamente diferente den e mesun empresa. Segun e mandatario, situacionnan asina ta daña e credibilidad di e sistema y ta afecta e capacidad di Gobierno pa evalua necesidadnan real di e mercado laboral y no ta descarta control riba esaki.
Pa responde na necesidadnan di comercio, e mandatario lo sostene varios encuentro cu dunadonan di trabao y otro actor relevante pa revisa y actualisa e lista di excepcion y lo publica esaki na final di juni 2026.
Minister Dowers tambe a enfatisa cu Aruba no por sigui permiti situacionnan unda personanan ta facilita entrada di familiar of conocinan cu na final ta keda sin cumpli cu nan obligacionnan migratorio y ta drenta e circuito laboral di manera ilegal.
E rol di garante no ta un formalidad. Ta un compromiso legal y moral cu tin consecuencia ora no cumplii cu e obligacionnan. Segun e mandatario, cualkier persona cu participa den actonan ilicito relaciona cu inmigracion por enfrenta consecuencia administrativo y legal, incluyendo retiro di permiso y deportacion den caso cu ley ta permiti.
Concluyendo, Minister Dowers a reafirma cu Aruba ta un pais di ley y orden y ta duna oportunidad na esnan cu kier integra, traha y contribui honestamente. Pero e tempo di haci mal uzo di flexibilidad y confiansa a caba. E maneho ta existi pa proteha nos comunidad, economia y futuro di Aruba.
Gobierno a brinda oportunidad, awo ta tempo pa cumpli cu responsabilidad
