Lider di fraccion di MEP, Evelyn Wever-Croes, a expresa preocupacion serio tocante manera cu Gobierno AVP–FUTURO a maneha e tema di HOFA den marco di Interparlementair Koninkrijksoverleg (IPKO). Segun e parlamentario, ta esencial cu Aruba ta bon representa na tipo di reunionnan aki, unda representantenan di Corsou, Sint Maarten y Hulanda ta presente y unda decisionnan cu tin impacto directo riba Aruba por wordo influi.
Wever-Croes a señala cu entre e parlamentarionan Hulandes cu ta participa na IPKO tin miembro di Tweede Kamer y Eerste Kamer, esunnan cu finalmente lo tuma decision riba e ley di HOFA. “Hulanda lo vota riba HOFA, no Aruba,” el a enfatisa, añadiendo cu precisamente pa esey ta crucial pa splica claramente con e proceso a tuma luga i kico ta e posicion real di Aruba.
Segun e lider di MEP, e aprobacion di HOFA a sosode sin consenso amplio den Parlamento di Aruba. E a acusa Gobierno di Aruba Mike Eman, Geoffrey Wever y Gerlien Croes di a actua sin respaldo amplio, cualificando e decision como un acto cu a pasa Parlamento y pueblo di Aruba un malicia cu awe Aruba ta den un posicion delicado.
Wever-Croes a lamenta cu presidente di Parlamento, Marlon Sneek, no a inclui HOFA como punto formal riba agenda di IPKO. No obstante, segun Wever Croes , fraccion di MEP a logra entrega documentacion na lidernan di delegacion Hulandes pa presenta su punto di bista.
Argumentonan contra HOFA
MEP ta sostene cu HOFA ta contradeci palabracionnan previo den IPKO 2022 y 2025, y cu e por drenta den conflicto cu Constitucion. Ademas, segun Wever-Croes, mas di 10 mil ciudadano a firma contra e ley, loke indica falta di respaldo social amplio.
El a agrega cu, segun informacion reciente, situacion financiero di Aruba ta mustra progreso positivo. Un carta di CAFT lo a indica cu den dos aña Aruba por alcansa su meta di reduccion di debe. Pa MEP, esaki ta cuestiona necesidad y urgencia di HOFA.
Fraccion di MEP ta afirma cu durante IPKO nan a presenta e “berdad di situacion” di Aruba na delegacionnan Hulandes, cu intencion di contraresta loke nan ta considera informacion manipula pa parti di Gobierno AVP–FUTURO.
Debate cu ta sigui
E discusion riba HOFA ta mustra cu, mas aya di dialogo interparlamentario, tin un debate politico profundo den Aruba mes tocante autonomia, maneho financiero y relacion cu Hulanda.Desde Gobienro AVP –FUTURI a sinta problema so tin.
Pa MEP, participacion na IPKO no ta simbolico so, sino un instrumento strategico pa defende posicion di Aruba na nivel internacional. E pregunta cu ta keda ta si e argumento presenta lo logra influencia decisionnan final cu lo wordo tuma na Hulanda.
